Դանիայի Հերնինգ քաղաքում ազատ ոճային ըմբիշներն ավարտեցին պայքարն աշխարհի մեծահասակների առաջնությունում:
![\"\"](\"https://www.aravot.am/2009/aravot_arm/September/25/p22.jpg\")
Ցավոք, Հայաստանի ազգային հավաքականի անդամներն իրենց միջին մակարդակի մրցելույթներով հայ մարզասերին ուրախանալու առիթներ չտվեցին:
Մրցումների վերջին օրը 74 կգ քաշային Սուրեն Մարկոսյանը ոչնչով չտարբերվեց իր թիմակիցներից: Մեկնարկային գոտեմարտում դժվարությամբ կոտրելով վրացի Գելա Սագիրաշվիլու դիմադրությունը (Սուրենը հաղթեց 3:2 հաշվով), երկրորդում միավորների 0:8 տարբերությամբ պարտվեց Բուլղարիայի ներկայացուցիչ Կիրիլ Թերզիեւին եւ բավարարվեց 15-րդ տեղով (31 մասնակիցների մեջ):
Թիմային պայքարում մեր հանրապետության հավաքականը ութ միավորով 16-րդն է: Իսկ լավագույն եռյակը կազմեցին Ռուսաստանը՝ 63 միավոր, Ադրբեջանը՝ 48 եւ Իրանը՝ 40:
Այսօր մեկնարկում են հունահռոմեական ոճի ըմբիշները: Մեր հավաքականից մարզիչները մեդալների որոշ սպասելիքներ ունեն:
