Մալդիվյան Հանրապետության կառավարությունը ստորջրյա նիստ է անցկացնելու՝ հանրության ուշադրությունը գլոբալ տաքացման վրա բեւեռելու նպատակով: Այս մասին հայտնում է «Panorama.am»-ը՝ հղում անելով «ԲԲՍ Նյուզ» լրատվամիջոցին:
Նախարարները հատուկ դասեր են անցնում, որպեսզի հոկտեմբերի 17-ին սուզվեն 6 մետր եւ այնտեղ անցկացնեն կառավարության նիստը: Նիստն անցկացնելու է հանրապետության նախագահ Մոհամեդ Նաշիդը:
Նիստի ժամանակ նախարարները միմյանց հետ շփվելու են հատուկ տախտակների եւ պայմանական նշանների օգնությամբ: Ամեն նախարարի ուղեկցելու է անհատական հրահանգիչ եւ թիկնապահ:
Նիստին մասնակցելու է կառավարության 15 անդամից 14-ը, քանի որ նախարարներից մեկին հակացուցված է սուզվելը:
Նիստի ժամանակ ընդունվելու է փաստաթուղթ, որով կոչ է արվելու աշխարհի երկրների կառավարություններին՝ նվազեցնել ջերմոցային գազերի արտանետումը:
