Երկուշաբթի օրը Վանաձորում կկայանա «Օրրան» ցերեկային խնամքի կենտրոնի բացումը: Վերջինս իր տանիքի տակ կհամախմբի 50 երեխաների: Գործունեության առաջին տարվա անհրաժեշտ ֆինանսավորումը Վանաձորի «Օրրանին» կտրամադրեն Բաց հասարակության ինստիտուտը եւ «ՎիվաՍել- ՄՏՍ» ընկերությունը: Վանաձորի «Օրրանը» կընդօրինակի Երեւանի «Օրրանի» մոդելը (հիմնադիրներ՝ Արմինե եւ Րաֆֆի Հովհաննիսյաններ), որն իր գործունեության ավելի քան 10 տարիների ընթացքում օգնել է հարյուրավոր ընտանիքների: Երեխաները խնամքի կենտրոն կհաճախեն անմիջապես դպրոցից հետո: Ըստ կարիքի՝ նրանց կտրվի նաեւ ճանապարհածախս: Շաբաթական 6 օր «Օրրանը» շահառուներին կտրամադրի սնունդ, իսկ «Օրրանի» աշխատակազմի եւ կամավորների օգնությամբ երեխաները կկատարեն տնային աշխատանքներ եւ ուսուցողական ծրագրեր: Նրանք կմասնակցեն տարբեր խմբակների` փայտագործության, մաքրամեի, ասեղնագործության եւ կավագործության:
«Օրրանը» շահառու երեխաներին կտրամադրի հագուստ, կոշիկ, գրենական պիտույքներ եւ բոլոր պարագաները, որոնք անհրաժեշտ կլինեն դպրոց հաճախելիս: Ազատ ժամերին երեխաների համար կկազմակերպվեն միջոցառումներ. այցելություններ՝ թատրոն, թանգարաններ, պատմական հուշարձաններ եւ այլն: Մասնաճյուղի պրոֆեսիոնալ անձնակազմի կողմից երեխաները կստանան նաեւ բժշկական եւ հոգեբանական ծառայություններ:
