Էրեբունի-Երեւանի հիմնադրման 2791-րդ տարեդարձին նվիրված միջոցառումների շարքը երեկ մեկնարկեց ԵՊՀ-ում: Պատմության ֆակուլտետի նախաձեռնությամբ կազմակերպված միջոցառմանը ներկա էր նաեւ քաղաքապետ Գագիկ Բեգլարյանը:
«Առավոտի» հետ զրույցում ԵՊՀ-ի հայոց պատմության ամբիոնի դոցենտ Արտակ Մովսիսյանն անդրադարձավ Էրեբունու անվան հետ կապված տարբեր տեսակետներին՝ նշելով, որ այդ բազմազանությունը վկայում է մեր դարավոր հետաքրքրությունը հայոց մայրաքաղաքի նկատմամբ. «Ժամանակին, որ հայտնաբերվել էր՝ Էրբունի էինք կարդում եւ կապում էինք Հայկազունիներից Արբուն նահապետի հետ, առաջարկ է եղել նաեւ Երվանդ թագավորի հետ կապել: Գիտական գրականության մեջ ժամանակին եղել է Էբանի, որը նշանակում է ավան: Որոշ տեսակետների համաձայն, Էր՝ ժողովրդի բնակավայր է նշանակել, առաջարկվել է նաեւ Ար Աստծո տուն… Սեպագրագետ Հովհաննես Կարագյոզյանն էլ Էր-ի մեջ երջանիկ բառն էր տեսնում՝ համարելով երջանիկ քաղաք, իսկ Էրեբունի թանգարանի ներկայիս տնօրեն Աշոտ Փիլիպոսյանն էլ Էրեբունին ստուգաբանում է իբրեւ հաղթանակ»:
Երեւանի պատմության թանգարանը ԵՊՀ-ին էր տրամադրել Հայաստանի 12-րդ մայրաքաղաքը ներկայացնող ցուցանմուշներ:
