Այսօր «Մետրոպոլ» հյուրանոցում տեղի կունենա լեգենդար բրիտանական Uriah Heep ռոք-խմբի անդամների մամուլի ասուլիսը: Մամուլի ասուլիսի ընթացքում երաժիշտները կխոսեն վաղը Երեւանում կայանալիք իրենց համերգի մասին:
«Մեդիամաքսի» փոխանցմամբ, խմբի ղեկավար Միք Բոքսը (Mick Box) վերջերս տված հարցազրույցներից մեկում ասել է. «Մենք շատ հուզված ենք, այդպես է լինում միշտ, երբ պետք է առաջին անգամ որեւէ տեղ ելույթ ունենանք: Ուրախ ենք, որ մեզ հրավիրել են համերգ տալ Երեւանում, իրոք անհամբեր սպասում ենք դրան»:
Երեւանյան համերգի ծրագրի մասին էլ նա նշել է. «Մենք այժմ ողջ աշխարհում ակտիվորեն ներկայացնում ենք մեր վերջին ալբոմը՝ «Wake the Sleeper»-ը, սակայն Երեւանում շատ այլ երգեր էլ կկատարենք Uriah Heep-ի դասական երգացանկից՝ «Gypsy», «July Morning», «Lady in Black», «Stealin\’», «Sympathy», «Look at Yourself» եւ այլն»:
