![\"\"](\"https://www.aravot.am/2009/aravot_arm/November/11/p20.jpg\")
Երեկ Կոմիտասի 26 շենքին հարակից տարածքի մոտ 10 ծառ օրը ցերեկով բուլդոզերով արմատախիլ էին արվում: Այստեղ ծառերը արմատախիլ անելուց հետո, թերեւս, հերթական սրճարանի կամ սպասարկման օբյեկտի հիմքի համար հսկայական փոս էր փորվել, ինչը առաջացրել է տարածքի բնակիչների զայրույթը: Նրանք մեզ հետ զրույցում դժգոհեցին. «Տեղից էլ մեր տարածքում կանաչը քիչ է, իսկ օբյեկտները՝ շատ, հիմա էլ եղած ծառերն են կտրում: Այս ծառերը հազիվ 2-3 տարեկան են, մենք ենք տնկել համաքաղաքային շաբաթօրյակի շրջանակներում: Մենք դեմ չենք շինարարությանը, բայց ինչո՞ւ են դրանք կանաչ տարածքների հաշվին հատկացնում»:
![\"\"](\"https://www.aravot.am/2009/aravot_arm/November/11/p21.jpg\")
Հիշեցնենք, որ Երեւանի քաղաքապետ Գագիկ Բեգլարյանը ընտրվելուց հետո խոստացել էր մայրաքաղաքի յուրաքանչյուր ծառին տեր կանգնել, այնինչ՝ հիմա օրը ցերեկով ծառ կտրելը դարձել է սովորական երեւույթ:
Կատարվածի կապակցությամբ «Առավոտի» թղթակիցը ահազանգեց ոստիկանության Արաբկիրի բաժին, որից հետո նշված վայր ժամանեց տեղամասային տեսուչը եւ ժամանակավորապես դադարեցվեցին ծառահատման աշխատանքները, որպեսզի շինթույլտվության առնչությամբ ուսումնասիրություններ կատարվեն: Մեր տեղեկություններով, տարածքում որոշել է շինարարություն իրականացնել «Աղրամանյան եղբայրներ» ՍՊԸ-ն՝ Արմեն Պետրոսյանի ղեկավարությամբ:
