Վրաստանի արտգործնախարար Գրիգոլ Վաշաձեն երեկ հայտարարել է, թե Ռուսաստանը պաշտոնական Թբիլիսիին Վրաստանի հետ սահմանը բացելու առաջարկ է արել: ԱԳ նախարարի ասելով, Ռուսաստանը Վրաստանի ԱԳՆ-ին պաշտոնական նոտա է փոխանցել՝ խնդրելով, որ երկու երկրների միջեւ սահմանի բացման հարցը ներկայացվի այդ երկրների փորձագետների քննարկմանը: «Սակայն մենք գտնում ենք, որ Ռուսաստանի այդ առաջարկին պետք է զգուշորեն վերաբերվել»,- APA գործակալության փոխանցմամբ՝ հայտարարել է Գրիգոլ Վաշաձեն:
Նա միաժամանակ շեշտել է, որ հիշյալ հարցը քննարկելու համար կողմերի փորձագետներն արդեն հանդիպել են. «Փորձագիտական խմբերն առայժմ միայն կարծիքներ են փոխանակել իրենց դիրքորոշումների վերաբերյալ: Բայց մենք գտնում ենք, որ Վրաստանի եւ Ռուսաստանի միջեւ սահմանի բացումը ձեռնտու է միայն Ադրբեջանին եւ Հայաստանին, իսկ Վրաստանի համար դա որեւէ նշանակություն չունի, որովհետեւ Ռուսաստանը արգելք է դրել մեր ապրանքների վրա, իսկ ՌԴ օրենսդրությամբ Վրաստանի քաղաքացիների մուտքը Ռուսաստան՝ արգելված է: Մենք չենք կարծում, որ սահմանի բացումը սրանով հանդերձ մեզ ձեռնտու կլինի»:
