Չորրորդ տարին անընդմեջ ՀՀ կրթության եւ գիտության նախարարությունը, Հայաստանի շախմատի ֆեդերացիան եւ Հայկական բարեգործական ընդհանուր միությունը համատեղ անցկացնում են Հայաստանի դպրոցականների շախմատի օլիմպիադան, որի երկրորդ փուլն այսօր մեկնարկեց Շախմատի ակադեմիայում: Մրցույթին մասնակցում էին Երեւանի Շենգավիթ համայնքի դպրոցների հաղթող թիմերը: Օլիմպիադան անցկացվում է չորս փուլով` ներդպրոցական, համայնքային, մարզային մրցումներ եւ եզրափակիչ փուլ, որը կայանալու է հաջորդ տարվա մայիսին: Օլիմպիադային մասնակցում են դպրոցականներ՝ Հայաստանի բոլոր մարզերից եւ Արցախից: Հանրապետական օլիմպիադան խթանում է մարզաձեւի զարգացումը դպրոցականների շրջանում, նպաստում շախմատի մասսայականացմանը, ինչպես նաեւ բարձրացնում շախմատի դերը ներդպրոցական կյանքում եւ ի հայտ բերում լավագույն շախմատիստերին ու առավել ակտիվ դպրոցներին: Հայաստանի շախմատի ֆեդերացիայի փոխնախագահ Ս. Լպուտյանը, ողջունելով մասնակիցներին, նշեց. «Այս մրցաշարի միջոցով մենք փորձում ենք շախմատն ավելի մոտեցնել դպրոցին, ավելի ամրապնդել մարզաձեւի դերն ու նշանակությունը հասարակության մեջ: Ես ե՛ւ որպես շախմատիստ, ե՛ւ որպես ֆեդերացիայի ներկայացուցիչ, ուրախ եմ, որ ֆեդերացիան, կրթության եւ գիտության նախարարության հետ համատեղ, ամեն ինչ անում է բարելավելու շախմատի դիրքերը, որ մենք ունենք այսօր աշխարհում, եւ այս մրցաշարն էլ այդ ուղղությամբ իրականացվող քայլերից մեկն է»: Եզրափակիչ փուլի հաղթողները ՀԲԸՄ կողմից կարժանանան համակարգիչների:
