Հոնդուրասի փաստացի կառավարության ղեկավար Ռոբերտո Միչելետտին երեկ լքել է իր զբաղեցրած պաշտոնը եւ մինչեւ դեկտեմբերի 2-ը չի մասնակցի պաշտոնական որեւէ միջոցառման: Հոնդուրասի գործող նախագահին կից նախարար Ռաֆայել Պինեդան հայտարարել է, որ Միչելետտիի այդ քայլը կապված է նոյեմբերի 29-ին Հոնդուրասում տեղի ունենալիք համընդհանուր ընտրությունների հետ: Երկրի փաստացի ղեկավարը որոշել է «ետ քաշվել»՝ երկրում հանգիստ, բաց եւ խաղաղ ընտրություններ անցկացնելու համար պայմաններ ապահովելու նպատակով: Առաջիկա ընտրություններն անցկացվելու են Գերագույն ընտրական տրիբունալի ղեկավարությամբ:
Միաժամանակ, «դե-ֆակտո կառավարության» ղեկավարը պատրաստակամություն է հայտնել անմիջապես վերադառնալ իր լիազորությունների կատարմանը, եթե դա պահանջի երկրում առկա իրավիճակը: Մինչ այդ, առաջիկա մեկ շաբաթվա ընթացքում Հոնդուրասը կղեկավարի Նախարարների խորհուրդը, որը ձեւավորվել է երկրում հունիսի 28-ին տեղի ունեցած խռովությունից հետո:
