Նալչիկում մեկնարկել է ՖԻԴԵ-ի կանանց «Grand Prix» մրցաշարի երրորդ փուլը, որին մասնակցում են 12 ուժեղագույն շախմատիստուհիներ՝ հայաստանցիներ Լիլիթ Մկրտչյանն ու Էլինա Դանիելյանը, Համփի Կոներուն (Հնդկաստան), Հու Յիֆանը եւ Չժաո Սյուեն (երկուսն էլ՝ Չինաստան), Պիա Կրամլինգը (Շվեդիա), Նանա Ձագնիձեն (Վրաստան), Տատյանա Կոսինցեւան եւ Բաիրա Կովանովան (երկուսն էլ՝ Ռուսաստան), Չժու Չենը (Քաթար), Մոնգոնտուլ Բաթհույագը (Մոնղոլիա) եւ Բեթյուլ Յիլդիզը (Թուրքիա):
Առաջին տուրում մեր շախմատիստուհիները հանդես էին գալիս սեւ խաղաքարերով: Լիլիթ Մկրտչյանը 47-րդ քայլում միավորը բաժանեց Պիա Կրամլինգի հետ, իսկ Էլինան Համփի Կոներուին տանուլ տվեց 37-րդ քայլում: Երեկ կայացած երկրորդ տուրում Լիլիթը կրկին սեւերով խաղալու էր Չժու Չենի հետ, իսկ Էլինայի մրցակիցը Բեթյուլ Յիլդիզն էր:
