Հունաստանի կառավարություն են վերադարձել սոցիալիստները

Հունաստանի վարչապետ Գեորգիոս Պապանդրեուն նախարարների կաբինետում կադրային լուրջ տեղաշարժեր է իրականացրել: Կառավարության կազմում իր պորտֆելը պահպանել է միայն երկրի ֆինանսների նախարարը:

BBC-ի փոխանցմամբ, կառավարությունում առանցքային մյուս՝ զարգացման, աշխատանքի եւ առողջապահության նախարարների պաշտոնները վստահվել են նոր թեկնածուների: Նոր կառավարության երդմնակալությունը տեղի է ունեցել երեքշաբթի օրը: Վերլուծաբանների կարծիքով, հույն վարչապետը նման արմատական քայլերի է դիմել երկու՝ տնտեսական եւ սոցիալական ոլորտներում կայունություն ապահովելու եւ երկրում իրականացվող տնտեսական խիստ միջոցառումներից զայրացած ընտրողներին հանգստացնելու պատճառով:

Հիշեցնենք, որ 2010թ. սկզբին Հունաստանի պետական պարտքը հասնում էր 300 մլրդ եվրոյի՝ կազմելով ՀՆԱ-ի 12,7 տոկոսը: Պապանդրեուն հայտարարել էր, որ եթե երկիրը չկրճատի իր ծախսերը՝ կհայտնվի «պարտքերի մեջ խեղդվելու» վտանգի առաջ:

Վերջերս ֆինանսների նախարար Յորղոս Պապակոնստանտինուն, որը պահպանել է նախարարի իր պորտֆելը, հայտարարել է, թե տնտեսության առողջացման ծրագիրը կատարվում է նախանշված ժամանակացույցից ավելի արագ տեմպերով: Միաժամանակ նախկին կառավարություններում բարձր պաշտոններ զբաղեցրած եւ հույների համար «լավ ժամանակների» հետ ասոցացվող Սոցիալիստական կուսակցության շատ անդամների վերադարձը՝ նոր ձեւավորված կառավարություն, ըստ փորձագետների, նպատակ ունի նվազեցնել բնակչության ցասումը Պապանդրեուի գլխավորած կառավարության նկատմամբ, մանավանդ որ՝ նոյեմբերի 7-ին Հունաստանում տեղի են ունենալու տարածաշրջանային ընտրություններ: