Թուրքիայի ԱԳՆ-ն արձագանքել է Եվրախորհրդարանի կողմից ընունված Թուրքիայի վերաբերյալ զեկույցին: News.am-ի մատուցմամբ, այդ երկրի արտաքին քաղաքականության գերատեսչությունը հանդես է եկել կոշտ հայտարարությամբ, կոչ անելով Եվրախորհրդարանին՝ լինել արդար եւ օբյեկտիվ գործունեություն ծավալել: «Եվրախորհրդարանի կողմից նմանատիպ զեկույցները կարեւորություն են ներկայացնում, երբ դրանք լուրջ եւ անկողմնակալ իրավիճակն են նկարագրում: Թուրքիան վճռականորեն շարունակելու է Եվրամիություն մտնելու իր նպատակի իրագործումը, եւ անհրաժեշտ է, որ ոչ ոք չկասկածի դրանում»,- ասված է Թուրքիայի ԱԳՆ-ի տարածած հայտարարության մեջ: Հիշեցնենք, որ Եվրախորհրդարանի՝ Թուրքիայի վերաբերյալ հերթական զեկույցում բավականին խիստ գնահատականներ կային: Քննադատության էր ենթարկվել մասնավորապես այդ երկրում իրականացվող բարեփոխումների անարդյունավետությունն ու վերջին շրջանում Թուրքիայում հայտնի լրագրողների ձերբակալությունները:
ԵԽ-ի զեկույցում պահանջ է ներկայացվել նաեւ հայտնաբերել Հրանտ Դինքի սպանության իրական մեղավորներին եւ կատարել Մարդու իրավունքների եվրոպական դատարանի վճիռը:
