Նոյեմբերի 10-21 ընկած ժամանակահատվածում մեկնարկել է «Գիսանե» երիտասարդական հանրապետական թատերական փառատոնը: Այն դրսեւորվելու եւ Ճանաչում ձեռք բերելու հնարավորություն է ընձեռում շատ երիտասարդների: Միջոցառումը «վերածնվել է» եւ ընդարձակվել` ներբուհականից վերածվելով հանրապետական փառատոնի: Այսօր «Մետրո» թատրոնում ներկայացվեցին թումանյանական հեքիաթները` իրենց միամիտ եւ պարզ հերոսներով: Սիրված կերպարներին մարմնավորել էին նույն թատրոնի սաները, ներկայացման ռեժիսորն էր Նիկոլայ Ծատուրյանը: Հանդիսատեսի առաջ «Անխելք մարդը», «Անբան Հուռին», «Կիկոսի մահը», «Սուտլիկ որսկանը» էին, վերնագրված էր` «Շաշաստան»: «Քանի որ սա հումոր է եւ այստեղ հավաքվել են Հովհաննես Թումանյանի այն հեքիաթները, որոնք պատմում են շաշերի մասին, «Շաշաստանը» շատ ճիշտ վերնագիր է»,- ասաց Աննա Հեքեքյանը, ով ժյուրիի անդամ էր: Փառատոնի ղեկավար Հայկ Ավագյանի կարծիքով` սա հնարավորություն է լավ կադրեր ստանալու համար. «Սա մաղ է, որն որ մաղում է առանձնացնելով տաղանդներին, ու վերջում կմնան լավագույնները»: Իսկ հանձնաժողովի նախագահ Լեւոն Իվանյանը համոզված է, որ հանդիսատեսին դուր եկավ «Շաշաստանը» եւ հավելեց. «Քանի որ ընդհանուր մշակութային դաշտը մարդկային ապրելակերպի ամենաբարձր տեսակն է, կուզենայի ավելի շատ փառատոններ տեսնել ու զարգացնել մեր նոր սերնդի մեջ արվեստն ու մշակույթը, որպեսզի նյութական ճահճային վիճակներից մարդիկ դուրս գային եւ կարողանային ապրել հոգեւոր կյանքով»:
Ռուբինա Սաֆարյան
