Լիբիայի նոր կառավարության մեջ, որի ամբողջական կազմը երեկ հրապարակեց երկրի վարչապետ Աբդել Ռահիմ ալ-Քիբը, կան երկու ապստամբ հրամանատարներ, որոնք մասնակցել են քաղաքացիական պատերազմին: Ֆավզի Աբդելալը, ով ղեկավարում էր զորքը Միստրատում, որտեղ բռնեցին Լիբիայի նախկին առաջնորդ Մուամմար Քադդաֆիին, դարձել է երկրի ներքին գործերի նախարարը: Մինչ այդ հաղորդվել էր, որ պաշտպանության նախարարի պաշտոնն էլ բաժին է հասել Օսամա ալ-Ջուվալին, ով Զինթանում առաջնորդել է ապստամբների այն խումբը, որը ձերբակալեց Քադաֆֆիին որդուն՝ Սեյֆ ալ-Իսլամին: Հետաքրքիր է, որ ի հեճուկս մինչ այդ տարածված ոչ պաշտոնական տեղեկատվության՝ Լիբիայի արտաքին գործոց նախարարի պաշտոնը ստանձնեց ոչ թե Իբրահիմ Դաբաշշին, այլ՝ Աշուր բին Հայալը՝ դիվանագետ արեւելյան Լիբիայից : Նավթի նախարարությունը կղեկավարի ENI ընկերության նախկին աշխատակից Բեն Յազզան: Կառավարության նոր կազմը համաձայնեցվել է Լիբիայի Ազգային անցումային խորհրդի հետ: Այս կառավարությունը կղեկավարի երկիրն այնքան ժամանակ, մինչեւ Լիբիայում կձեւավորվեն իշխանական ինստիտուտները: Ենթադրվում է, որ առաջիկա յոթ ամիսների ընթացքում լիբիացիները կընտրեն Ազգային խորհուրդ, որը կկազմի Սահմանադրություն, ապա կնշանակվեն խորհրդարանական ընտրություններ:
