ԱԺ «Ժառանգություն» խմբակցության պատգամավոր Ստեփան Սաֆարյանը ՀՀ կառավարության ներկայացուցիչ Անդրանիկ Անդրեասյանին հարցրեց, թե ջրային տնտեսությանը տրված վարկը ինչպե՞ս է ծախսվելու եւ ի հավելումն ասաց. «Դուք ուրիշներին եք մեղադրում գրանտակեր լինելու մեջ, բայց ամենամեծ գրանտակերը պետությունն է»: Նաեւ ուզեց իմանալ՝ ՀՀ-ն կարողանալո՞ւ է դուրս գալ այս պարտքերի տակից, հատկապես՝ երբ այս վարկերի ծախսման օբյեկտիվությունը կասկածի տակ է:
«ԱԺ վարկերի հետ կապված կան ավանդական հարցեր, որ տրվել են մարդկության պատմության սկզբից եւ կավարտվեն մարդկության հետ միասին, սակայն դա չի նշանակում, թե այդ հարցերը չպետք է տրվեն»,- պատասխանեց պրն Անդրեասյանը, ըստ որի՝ վարկերի արդյունավետությունը բավականին բարձր գնահատվում է նաեւ նրանց կողմից, ովքեր դրանք մեզ են տրամադրում:
Հետո հարց պետք է տար Արմեն Մարտիրոսյանը, սակայն նրա անունը հնչեցնելուց անմիջապես հետո Սամվել Նիկոյանը հայտարարեց, թե պատգամավորը հարցը հանում է: Աղմուկ բարձրացավ ԱԺ դահլիճում, քանի որ պարոն Մարտիրոսյանը հարցը չէր հանել, պարզապես չէր լսել, որ հնչեցրել են իր անունը: Ի պատասխան պատգամավորի դժգոհության՝ ԱԺ փոխնախագահը խորհուրդ տվեց «ականջները լվանալ»:
Այն պահին, երբ Արմեն Մարտիրոսյանը հանգիստ իր հարցն էր հնչեցնում, մեկ էլ հանկարծ դահլիճում սկսեց աղմկել Շմայսը` Առաքել Մովսիսյանը: Գոռգոռոցին ի պատասխան՝ Արմեն Մարտիրոսյանը եւս գոռգոռաց, Սամվել Նիկոյանը փորձեց հանդարտեցնել բոլորին: Այս ընթացքում Շմայսը դեռ գոռգոռում էր: Ստեփան Սաֆարյանը հորդորեց կողմնորոշվել` եթե սա մեր բոլորի աշխատանքի վայրն է, եկեք այդպես էլ վերաբերվենք այս վայրին:
Կարդացեք նաև
Մարգարիտ ԵՍԱՅԱՆ
