Հոկտեմբերի 2-ին Հայաստան-Վրաստան միջպետական ճանապարհին, Այրում քաղաքի մոտ սողանքից փլվեց նաեւ Այրում ՀԷԿ-ի մոտից սկիզբ առնող ոռոգման ինքնահոս ջրագծի մի հատված: Այրումի քաղաքապետ Գիգոլ Եգանյանն ասաց, որ սողանքի առաջին հարվածն ընկավ ջրագծի խողովակների վրա, եւ եթե դա չլիներ, զոհերն ավելի շատ կլինեին: Այրումին հարեւան Հաղթանակ գյուղի գյուղապետ Վարդ Խաչատրյանը եւ գյուղապետարանի աշխատակիցները վկայում են, որ այդ ջրագծով Դեբեդի հովտում ինքնահոս ոռոգվում էր մոտ 1000 հեկտար տարածք, այդ թվում` դեղձի այգիներ: Մտավախություն կա, որ սողանքից փլված ճանապարհը գարնանն ուշ կվերականգնվի, այգիները եւ ցանքսերը կմնան անջրդի:
Այրումի մեկ այլ հարեւան՝ Լճկաձորի համայնքապետ Սուրիկ Մարտիրոսյանի խոսքով, գարունը Դեբեդի հովտում շուտ է գալիս, մշակաբուսերից ամենաուշն իրենք եգիպտացորենի ցանքն են կատարում` ապրիլի 14-15-ին: Մտավախություն կա, որ մինչ այդ սողանքից քանդված 350 մ ճանապարհը, դրա հետ նաեւ ոռոգման ջրագիծը վերականգնված չեն լինի:
Ոսկան ՍԱՐԳՍՅԱՆ
