Նախկինում լատինական տանգոն միայն տղամարդկանց համար էր, նրանք հատուկ պարում էին` ցուցադրելու իրենց առնականությունը: Տանգոն կրքի խորհրդանիշ է: Տանգոյում ընդունված չէ խոսել, ժպտալ և նայել միմյանց աչքերին: Կարելի է միայն հայացք և հպում:
«Արգենտինական տանգո» խորագիրն էր կրում օրերս Կոմիտասի անվան կամերային երաժշտության տանը կայացած «Օվո» Բենդի համերգային երեկոն: «Օվո» Լատիներեն նշանակում է ձու, այսինքն սկիզբ: Խմբի անդամներն են` ջութակահար Գոգա Վանյանը, սաքսոֆոնահար Արթուր Եղիազարյանը, ակորդեոնահար Գագիկ Դանիելյանը և կիթառահար Հրայր Մկրտչյանը:
Խմբի պրոդյուսեր Բիայնա Դանիելյանը գոհ է համերգի արձագանքներից, հատկապես, որ իրենք համերգի մասին հեռուստա և ռադիոգովազդ չեն արել, այլ տեղեկացրել են Ֆեյսբուքի, որոշ կայքերի, աֆիշների միջոցով:
Այն հարցին, թե ինչո՞ւ հենց «Արգենտինական տանգո» վերնագիրը, Բ.Դանիելյանն ասաց. «Արգենտինական տանգո, որովհետև խումբը սիրում է հեղինակ Աստոր Պիազզոլլային, բացի դա, նրա ստեղծագործությունները 21-րդ դարում ամենաշատ կատարվողներից են:Հայսատանում այդ ստեղծագործություններից հաճախ կարելի է լսել սրճարաններում, գովազդներում, բայց դրանցից մի քանիսն են միայն, որ ծանոթ են, լսվում են և սիրվում, իսկ մենք որոշեցինք ընդլայնել այդ երաժշտական ցանկը և հանրությանը ներկայացնել ավելի շատ ստեղծագործություններ, որոնք դեռևս այնքան էլ ծանոթ չեն»:
Իսկ թե ինչ ծրագրեր ունի Օվո Բենդը առաջիկայի համար, Բ.Դանիելյանն ասաց, որ նրանք հունվարից երկու նախագիծ են իրականացնելու «Jazz Mood», որը կազմված կլինի ջազային ստանդարտներից և Կոմիտասի ստեղծագործություններից, որը կներկայացվի յուրովի: Յուրահատկությունը կայանում է նրանում, որ մշակումներն անելու են տղաները և ներկայացնելու են մինչ այդ չկատարված գործիքներով:
Ութամսյա երկարատև աշխատանքից հետո, խմիբի անդամները պատրաստվում են Նոր Տարին նշել իրենց հայեցողությամբ և փոքր ինչ հանգստանալ:
Լիլիթ Շարբաթյան
