Լուսանկարն արվել է ՃՏՊ-ից անմիջապես հետո. մեջտեղում նախագահ Անդրիս Բերզինշն է, աջից` խոսնակ Սոլվիտա Աբոլտինին:
Երեկ` ուրբաթ օրը, Ռիգայի կենտրոնում իրար են բախվել Լատվիայի նախագահ Անդրիս Բերզինշի եւ Լատվիայի խորհրդարանի` Սեյմի նախագահ Սոլվիտա Աբոլտինիի մեքենաները: Դեպքը պատահել է Ազատության հուշարձանի մոտ, որի մոտ ծաղիկներ դնելու համար հավաքվել էին երկրի գլխավոր դեմքերը` ի հիշատակ 1991 թվականին բարիկադներ կառուցելու փաստի: Որոշ տեղեկությունների համաձայն` մեքենաների հարվածի պահին եւ երկրի նախագահը եւ խորհրդարանի խոսնակն արեն դուրս էին եկել մեքենաներից, մեկ այլ տեղեկություններով էլ` խոսնակը դեռ մեքենայի մեջ էր:
Քաղաքական գործիչները չեն տուժել, սակայն նրանց մեքենաները վնասվել են: ՃՏՊ-ի մեջ ըստ լատվիական լրատվական գործակալությունների` մեղավոր էր Ռազմական ոստիկանության ներկայացուցիչը, որի մեքենան հարվածել է Աբոլտինիի մեքենային:
Լատվիայի բարձրաստիճան պաշտոնյաների մասնակցությամբ վերջին վթարը տեղի է ունեցել չորս տարի առաջ, երբ այն ժամանակվա վարչապետ Իվարս Գոդմանիսի ծառայողական մեքենան բախվել էր ուղեւորատար միկրոավտոբուսին: Կառավարության ղեկավարը ուղեղի ցնցում էր ստացել եւ գանգոսկրի ճաք, իսկ միկրոավտոբուսի մի ծեր ուղեւորուհի վնասել էր ոտքը: Նկատենք, որ Լատվիայում ընդունված չէ` ՎԻՊ պաշտոնյաների մեքենաներն անցնելու համար երթեւեկությունը կանգնեցնելը:
