Այսօր Գյումրու «Սամարիթեր» հիվանդանոցի գործադիր տնօրեն Ռաֆիկ Խաչատրյանը, անդրադառնալով, «Վարչապետը պայքարում է դեղագողության դե՞մ» վերնագրով մեր հրապարակմանը` պարզաբանեց, որ իր գլխավորած հիվանդանոցը ՀՀ առողջապահության նախարար Հարություն Քուշկյանի կողմից «դեղերի կոծկված գնացուցակի» հետ կապված երբևէ նկատողություն չի ստացել: «Անցած տարի, այս ժամանակ առողջապահության նախարարը հանձնախումբ ուղարկեց Շիրակի մարզի հիվանդանոցներ, նրանք այցելեցին նաև մեր հիվանդանոց ու արձանագրեցին, որ աղբարկղը դատարկ չի եղել, ուշ ժամ էր, այդ պատճառով էլ դատարկ չէր, թեև ես դրա համար ներողություն եմ խնդրել, ընդունել եմ, որ դա մեր թերությունն է: Նախարարական խմբին դուր չէր եկել նաև այն, որ սրտաբանական բաժանմունքում ներարկիչները թափված են եղել , իհարկե դրանք նոր էին ու բուժքույրը դասավորում էր: Բայց դեղերի գնացուցակի հետ կապված դիտողության, այդպիսի գրավոր ակտ գոյություն չունի: Դեղերի գնացուցակը պարտադիր է փակցնել ամբուլատոր բուժման ենթակա հիվանդների համար, իսկ մեր հիվանդանոցը ստացիոնար է, մեկին թանկ դեղ է անհրաժեշտ, մյուսին` էժան, հետևաբար և այդ օրենքը մեզ չի վերաբերում»,- ասաց տնօրենը: Նա նշեց, որ իր հիվանդանոցը միակն է մարզում, որ պարբերական մրցույթ է հայտարարում դեղորայքի և բժշկական պարագաների գնման համար:
Նունե ԱՐԵՎՇԱՏՅԱՆ
