«Ես առաջիկա ԱԺ ընտրություններում մեծամասնական ընտրակարգով առաջադրվելու իմ որոշումը միանշանակ կայացրել եմ ու առաջադրվելու եմ Արաբկիր համայնքում»,- երեկ ի պատասխան Aravot.am-ի հարցին՝ արդյոք իր առաջադրման վերաբերյալ վերջնական որոշում կայացրե՞լ է, ասաց նախկին քաղբանտարկյալ, անկուսակցական Սուրեն Սիրունյանը՝ հավելելով, թե վերջնականապես որոշված չէ միայն մեկ բան՝ համայնքի երկու ընտրատարածքներից որո՞ւմ է առաջադրվելու: «Սպասում եմ, տեսնեմ այդ երկու ընտրատարածքներում ովքե՞ր են առաջադրվելու»,- վստահեցրեց Սիրունյանը:
Մեր ճշգրտող հարցին, թե՝ ակնկալում է, որ իր մրցակինցներն ավելի թո՞ւյլ, թե՞ ուժեղ թեկնածուներ լինեն, պատասխանեց. «Առհասարակ ես պարտվողի հոգեբանություն չունեմ: Եթե մասնակցում եմ ընտրություններին՝ ապա անպայման հաղթելու վճռականությամբ: Եթե մարդիկ կան, որոնք իրենց ամբողջ կյանքում նպատակ են ունեցել միայն մասնակցել այս կամ այն ընտրություններին՝ պարտվելու պատրաստ լինելով, ապա ես նրանցից չեմ: Ինձ համար նշանակություն չունի՝ մրցակիցս ուժե՞ղ, թե՞ թույլ, քաղաքական գործի՞չ, թե՞ օլիգարխ, ընդդիմությո՞ւն, թե՞ «դիմություն» է լինելու»:
Այսինքն, դուք պատրաստ եք նաեւ ընդդիմադիր թեկնածուի դեմ է՞լ պայքարել: «Ես իմ առաջ նման խնդիր չեմ դրել: Ես արդեն որոշել եմ, որ պետք է մասնակցեմ ընտրություններին եւ մասնակցեմ Արաբկիր համայնքում, թե ո՞վ իր թեկնածությունն իմ դեմ կդնի՝ ինձ համար կարեւոր չէ: Ով ուզում է լինի, եթե գտնում է, որ կարող է այդ ընտրատարածքում ինձ հաղթել՝ չարաչար սխալվում է: Մյուս կողմից, ես շատ ուրախ կլինեմ, որ իմ մրցակիցը լինի կուսակցական առաջնորդի դեմքով», – մեր հարցադրմանն այսպես արձագանքեց Սուրեն Սիրունյանը:
