Ինչպես տեղեկացրել ենք, մոտ մեկ շաբաթ առաջ ԲՀԿ-ականները, թակելով Գյումրու ամենամեծ թաղամասի`Անիի բնակիչների դռները` ընտրացուցակները ճշգրտելու պատրվակի տակ սկսել էին սեփական կուսակցության քարոզն անել: Այնուհետեւ բնակիչներին հարցուփորձի էին ենթարկել , թե մեծամասնական ընտրակարգով առաջադրվող ո՞ր թեկնածուին են պատրաստվում իրենց ձայնը տալ` ԱԺ պատգամավոր, ԲՀԿ Շիրակի մարզային կառույցի ղեկավար Մարտուն Գրիգորյանի՞ն, թե՞ երևանաբանկ բիզնեսմեն, «Շիրակ» ֆուտբոլային ակումբի սեփականատեր Արման Սահակյանին:
Մի խոսքով ԲՀԿ-ականները փորձել են կողմնորոշվել` թե ո՞ վ է այսպես ասած մարտունական, ով` արմանական: Նշենք, որ թեև Արման Սահակյանը կուսակցական չէ, սակայն նրան սատարելու է ՀՀԿ-ն:
Այսօր գրեթե նույն սցենարով` նույն թաղամասի բնակիչների դռներն են թակել ՀՀԿ-ականները: Այստեղ էլ տնետուն ընկնելու համար երկու կին են ընտրել, որոնք ներս մտնելուն պես, առանց ավելորդ ձևականությունների` բնակիչներին հարց են ուղղել` դուք ո՞ ր կուսակցությանն եք սատարելու ու ու՞ մ եք ընտրելու` Մարտունի՞ ն, թե՞ Արմանին: Ի պատասխան վերջիններիս` Արամ Խաչատրյան փողոցի 31 շենքի բնակիչներից մեկը` նրանց ասել է. «Ձեր ի՞ նչ գործն է, ես ում կընտրեմ, հերիք ու բոլ չեղա՞վ, դուք գնացեք` Ձեր վերնախավին փոխանցեք, որ ՀՀԿ-ին ձայն չենք տալու, և գիտեք ինչու՞ . հերիք չէ աղքատության մեջ փտող Շիրակի մարզը ձեր կառավարման տարիներին ընչազուրկ դարձրեցիք, հիմի էլ ընտրությունների նախաշեմին ` նոր սյուրպրիզնե՞ր եք անում` հացի գինը 10-20 դրամով թանկացնու՞մ եք»:
Հանրապետական կանայք իրոք զարմացել են` լսելով Գյումրիում հացի գնի թանկացման մասին: Նրանք տեղում զանգահարել են երևանյան իրենց գրասենյակ` ճշտելու, թե թանկացումը ամբողջ հանրապետությունու՞մ է , թե՞ միայն Գյումրիում, եւ խիստ զարմացել են` իմանալով, որ այն միայն սոված ու ցամաք հացի կարոտ այս քաղաքում է: Ի դեպ, հացի գները Գյումրիում զգալիորեն բարձրացել են երեկվանից, այսօր իրենց օրապահիկ հացը գնող գյումրեցիները խանութներում ամենավերջին անեծքն էին հնչեցնում կառավարության հասցեին: Իսկ թե ինչու է առաջին անհրաժեշտության այս ապրանքի գները ընտրությունների նախաշեմին պաշտոնապես ամենաաղքատ ճանաչված Շիրակի մարզում այսպես բարձրացել, կանդրադառնանք տպագիր «Առավոտ»-ի առաջիկա համարներում:
Կարդացեք նաև
Նունե ԱՐԵՎՇԱՏՅԱՆ
