Այս սեզոնին, երբ գյուղատնտեսական աշխատանքները դեռ չեն սկսվել, գյուղերում մարդկանց հիմնական զբաղմունքը հայկական հեռուստասերիալներն են:
Նոյեմբերյանի տարածաշրջանի բնակիչները սերիալներից ազատ ժամանակ էլ քննարկում են դրանք: Նրանք տարածքի գյուղերի կյանքը նմանացրել են սերիալների անվանումներին: Սահմանամերձ Բարեկամավան գյուղն ապրում է դժվարին կյանքով, հողերի մեծ մասը ադրբեջանցիների վերահսկողության կամ նշանառության տակ է: Բարեկամավանի կյանքը սերիալ դիտողները «կնքել են» «Դժվար ապրուստ»:
Դեբեդավանը Բագրատաշենի մաքսակետից այն կողմ է, Վրաստանի հետ սահմանագծին: Դեբեդավանը կոչել են «Եզրագծից այն կողմ»:
Փոքրիկ Այրում քաղաքից մեծ թիվ են կազմում Ռուսաստան արտագնա աշխատանքի մեկնողները` «խոպանչիները»: Այրումի կյանքը սերիալի հանգույն կոչել են` «Ո՞ւր է իմ տղամարդը»:
Կարդացեք նաև
Տավուշի մարզի բնակչությամբ ամենամեծ գյուղում` Կողբում, մեծ թիվ են կազմում հիմնարկների տնօրենները, կուսակցական ղեկավարները, գործարարները, այստեղ բախվում են կուսակցական, գործարար, հատվածական շահեր: Կողբի կյանքը նոյեմբերյանցիները կոչել են «Որոգայթ» :
Ոսկան Սարգսյան
