Ռուսական լրատվամիջոցների հաղորդմամբ` փետրվարի 29-ին Սանկտ Պետերբուրգում ստորագրվել է նույնասեռականության եւ մանկապղծության քարոզչությունն արգելող օրենք, ըստ որի` անչափահասների շրջանում նման քարոզչությամբ զբաղվողները կենթարկվեն պատասխանատվության` 500 հազարից մինչեւ մեկ միլիոն ռուբլի տուգանքի չափով: Օրինագծի հեղինակ պատգամավորների հաղորդմամբ՝ քարոզչություն ասելով պետք է հասկանալ ոչ միայն սեռական փոքրամասնությունների կողմից հանրահավաքների եւ պիկետների անցկացումն, այլեւ` հրապարակային հայտարարությունները, որոնք ուղղված կլինեն անչափահասների շրջանում ոչ ավանդական սեռական հարաբերությունների պոպուլյարիզացիային:
Օրինագծի վերաբերյալ Սանկտ Պետերբուրգի ԼԳԲՏ համայնքի ներկայացուցիչներն արդեն հանդես են եկել իրենց բողոքի ակցիաներով: Իսկ նրանց իրավապաշտպանները պետերբուրգյան օրենսդիրներին մեղադրում են նույնասեռականների իրավունքների ոտնահարման մեջ, քանի որ ոչ ավանդական սեռական կողմնորոշումն, ըստ էության, հավասարեցվել է մանկապղծությանը: Ըստ vesti.ru-ի` Ռուսաստանի մարդու իրավունքների պաշտպան Վլադիմիր Լուկինը տարօրինակ է համարել օրենքի ընդունումն ու հայտարարել, որ դրանով ոտնահարվում են մարդու իրավունքները:
Եվա ՀԱԿՈԲՅԱՆ
