Այսօր ՕԵԿ երիտասարդական միության 8-րդ համագումարին կուսակցության նախագահ Արթուր Բաղդասարյանը առաջարկեց խորհրդարանի ներսում 131 անդամից բաղկացած սեփական խորհրդարանը ձեւավորել, նույնիսկ ընտրել եւ ունենալ սեփական նախարարներ, որոնք ինչ-ինչ հարցեր կբարձրացնեն, ՕԵԿ-ի օրենքի նախագծերը ներկայացնեն եւ այլն:
Իր ողջույնի խոսքում Արթուր Բաղդասարյանը նշեց. «Մենք պիտի հաղթենք, որովհետեւ մենք ազնիվ ենք, արդար ենք: Չարախոսներ կան ու կլինեն, բայց նրանք պետք է անցնեն մեր կողքով թեթեւ քամիների պես: Մենք դեմ ենք չարախոսներին, մենք երբեք ուրիշներին փնովելով ու վիրավորելով չենք զբաղվում: Մենք ունենք մեր տեսակը»:
Համագումարին ներկա երիտասարդները շնորհակալություն էին հայտնում իրենց կուսակցության ղեկավարին եւ իրենց ելույթներում անպայման նշում, թե ինչքան խելացի կրթված, բազմակողմանի զարգացած անձնավորություն է պարոն Բաղդասարյանը, նույնիսկ եղավ տեսակետ, որ նա Հայաստանի ամենաերիտասարդ քաղաքական գործիչն է: Համագումարին երիտասարդական միության նախագահ վերընտրվեց Առաքել Առաքելյանը:
ՕԵԿ երիտասարդական միությանը ողջունելու էր եկել նաեւ արդեն ԵԺԿ-ին անդամակցող Հունգարիայի քրիստոնեա-դեմոկրատական երիտասարդական միության ներկայացուցիչը, որը վստահություն հայտնեց, որ առաջիկա ընտրություններում ՕԵԿ-ը հաղթելու է:
Կարդացեք նաև
Հռիփսիմե ՋԵԲԵՋՅԱՆ
