– Պրն Մուկուչյան, ինչպե՞ս է Կենտրոնական ընտրական հանձնաժողովը նախապատրաստվում ընտրություններին:
– Նախապատրաստական աշխատանքներն ավարտված են: Ավելին՝ մենք հենց այսօր պատրաստ ենք ոչ միայն ընտրություններ անցկացնել, այլեւ հրապարակել արդյունքները:
– Փաստորեն՝ նախօրեին իսկապես եղել եք նախագահականում եւ վերջնական ճշտումներ արել…
– Ոչ, ոչ: Ուզում եմ ընդգծել, որ քաղաքական ուժերին ընտրելու է ժողովուրդը:
Կարդացեք նաև
– Իսկ ՀՀԿ-ի՞ն:
– Դե ՀՀԿ-ին էլ ընտրելու է… Ախր ինչո՞ւ եք սեպ խրում հայության տարբեր հատվածների միջեւ: Հայը հայ է, ի՞նչ տարբերություն՝ ՀՀ քաղաքացի՞ է, թե ոչ:
– Այ տեսնո՞ւմ եք: Իսկ ԿԸՀ նախագահ դառնալուց առաջ հանրությանը հայտնի էիք որպես ազնիվ, պարկեշտ, առաքինի անձնավորություն…
– Ստոր հերյուրանքներ են: Ես միշտ էլ համապատասխանել եմ ՀՀԿ չափանիշներին:
– Լավ: Պաշտոնական քարոզարշավը դեռ չի սկսվել, բայց ՀՀԿ-ն արդեն բացահայտ քարոզչություն է իրականացնում. դա օրենքի խախտում չէ՞:
– Ոչ, դա օրենքի խախտում չէ: ՀՀԿ-ի քարոզչությունը չի կարող քարոզչություն համարվել, որովհետեւ քարոզարշավը դեռ չի սկսվել:
– Օրենքի խախտումը հենց այն է, որ քարոզարշավը դեռ չի սկսվել, բայց…
– Ձեր հարցը կոռեկտ չէ:
– Լավ, ո՞րն է ձեր սիրած գրական ստեղծագործությունը:
– Հիմա եթե ասեմ «Գովք հիմարության»՝ պիտի ասեք իշխող կուսակցության օգտին քարոզարշավ եմ անում…
– Ձեր սիրած ֆիլմը:
– «Մեռած հոգիներ»: Շա՛տ ժամանակակից թեմա է:
– Ձեր սիրած նկարիչը:
– Ճիշտն ասած՝ տեղյակ չեմ, թե ընտրողների ցուցակը ով է կազմել…
– Ձեր սիրած երգը:
– «Վեր կաց գերեզմանից…» կասեի, բայց վախենում եմ ընկալվի որպես ընտրություններին մասնակցելու կոչ:
– Ձեր սիրած ուտելիքը:
– Ես, որպես ԿԸՀ նախագահ, պարտավոր եմ հավասարապես սիրել բոլոր ուտելիքները: Բայց նախընտրում եմ թաթարբորակի:
– Ինչո՞ւ:
– Դե եսի՞մ, ընդդիմությունը մեզ մոնղոլ-թաթար է ասում, ինչ է ասում…
«Չորրորդ ինքնիշխանություն»