«Համագործակցության մասին որեւէ խոսք չկա», այսպես արձագանքեց ԲՀԿ առաջնորդ Գագիկ Ծառուկյանն Aravot.am-ի հարցին՝ արդեն տեւական ժամանակ է՝ առաջին նախագահը խոսում է ԲՀԿ-ի եւ ՀԱԿ-ի համագործակցության մասին, մինչդեռ ձեր արձագանքն այդպես էլ չի հետեւում:
Պարոն Ծառուկյանը հավելեց նաեւ, որ ԲՀԿ-ի նպատակն է արդար ընտրություններ անցկացնելը, ինչի համար իրենք ստորագրել են մի քանի ձեւաչափերով համագործակցության փաստաթղթեր, դրանցից մեկի տակ նաեւ ՀԱԿ-ի ստորագրությունը կա:
Լրագրողներից մեկի դիտարկմանը, թե առաջին նախագահը պահանջում է, որպեսզի ԲՀԿ-ն կոալիցիայից դուրս գա, փաստորեն ՀՀԿ-ի դեմ դուրս գա, Ծառուկյանը հակադարձեց, որ Լեւոն Տեր-Պետրոսյանը նման բան չի ասել: Ու կրկին հավելեց, որ ազատ, արդար ընտրությունների համար ԲՀԿ-ն պատրաստ է ցանկացած համագործակցության:
Թե քանի՞ տոկոս մասնակցություն է ակնկալում ԲՀԿ-ն այս ընտրություններում եւ քանի՞ տոկոս ձայն կհավաքի, Գագիկ Ծառուկյանն ասաց. «Ես այսօր ինքնագովազդով չեմ զբաղվում: Կուսակցություններին գնահատական ու ձայն տվողը ժողովուրդն է»:
Կարդացեք նաև
Ինչ մնում է «Ժառանգության» ներկայացուցիչների կողմից հնչեցրած այն մեղադրանքներին, որ ՀԱԿ-ն ու ԲՀԿ-ն գաղտնի պայմանավորվածություններ ունեն, Ծառուկյանը հայտարարեց. «Ժառանգությունն» ում կողմից ուղղորդված շարժվում է՝ թող ինքն իրեն էլ մեղադրի»: ԲՀԿ առաջնորդը չմանրամասնեց, թե ում կողմից է ուղղորդված շարժվում «Ժառանգությունը»:
Նելլի ԳՐԻԳՈՐՅԱՆ
