Ամեն տարի գարնան և հատկապես ամռան ամիսներին լինում են օրեր, երբ արևի ճառագայթներն առավելագույն վտանգ են ներկայացնում տեսողության համար: Նման պահերին օգնության են գալիս արևային ակնոցները, որոնք կանխում են մեր աչքերին սպառնացող վտանգը:
Արևային ակնոցները, որոնց անվանում են նաև արևապաշտպան ակնոցներ, առաջին անգամ օգտագործվել են ծայրամասային հյուսիսում, որտեղ դրանք ավելի շատ անհրաժեշտ էին «ՙձյան կուրությունից» խուսափելու համար: Սա մի հիվանդություն է, որն առաջանում է երկար ժամանակ ձյանը նայելիս, որի այրող լույսը կարող է աչքերի հիվանդության պատճառ դառնալ: «ՙՙԵրբեմն իսկապես ձյան փայլը կարող է ավելի վնասակար լինել, քան կիզիչ արևը, և այստեղ ակնոցներն էական նշանակությոն են ստանում: Արևի ճառագայթներից կարելի է խուսափել նաև այլ միջոցներով` անձրևանոց, հովարով գլխարկներ և այլն, բայց սպիտակ ձյան փայլից` միայն ակնոցներով»,– բացատրում է ակնաբույժ Մարինե Գրիգորյանը:
Գունավոր ապակիներով ակնոց ստանալու առաջին փորձն արել է գիտնական Էսկոտը, սակայն դրանք արևապաշտպան չէին: Գիտնականը կարծում էր, որ կանաչ և կապույտ գույների ապակիներով ակնոցները պարզապես լավացնում են տեսողությունը: Առաջին ակնոցները պատրաստվում էին կենդանիների ոսկորներից, երկաթից կամ այլ նյութերից, սակայն չէր գործածվում ապակին, ինչն այժմ ակնոցների արտադրության գլխավոր բաղադրիչն է: Արևային ամենահին ակնոցներն ունեին շատ նեղ ու երկար մի անցք, որտեղից արևից, ձյունից եկող լույսն ու ճառագայթները հնարավորինս քիչ էին հասնում աչքերին:
Դժվար է միանշանակ ասել, որ արևային ակնոցները միայն պաշտպանիչ բնույթ են կրում: «Ակնոց ընտրելիս պետք է շատ ուշադիր և զգոն լինել: Իհարկե բարձր գինը երբեմն կարող է վկայել նրա բարձր որակի մասին, սակայն միանշանակ դա ասել չի կարելի է: Ի դեպ, սխալ է կարծիքը, թե լավ է կրել գոնե էժանագին մի բան, քան ընդհանրապես անպաշտպան դուրս գալ տանից: Իրականում երբեմն այդ անորակ ակնոցները կարող են այնպիսի հետևանքներ առաջացնել, որոնք չէին լինի դրանց բացակայության դեպքում, անգամ կիզիչ արևի կամ փայլող ձյան առկայությամբ»,-ասում է Մարինե Գրիգորյանը:
Լուսինե Մանուկյան
