Այսօր վարչապետ Տիգրան Սարգսյանը այցելել էր Գյումրի` նորակառույց Մուշ 2 թաղամասի բնակարանաշինությանն ու այս թաղամասը Գյումրու Բուլվարային թաղամասին կապող ճանապարահաշինության ընթացքին ծանոթանալու, նաև «Գլենդել Հիլզ» շինկազմակերպության նախաձեռնած ծառատունկին մասնակցելու նպատակով: Վարչապետի` նորակառույց թաղամաս ոտք դնելն ու հորդառատ անձրև տեղալը մեկ եղավ, այնպես որ կառավարության ղեկավարը ստիպված եղավ իրեն բաժին հասնող ծառը տնկել անձրևանոցի տակ: Այնուհետ մտավ նոարկառույց բնակարաններից մեկը ու դուրս գալով`հենց շենքի նախամուտքում մի քանի բառով պատասխանեց լրագրողների հարցերին: Այն հարցին, թե գո՞հ է արդյոք Տիգրան Սարգսյանը շենքերի որակից, վարչապետն ասաց, որ կարևորը բնակիչները գոհ լինեն ու միաժանակ շեշտեց, որ որակյալ շինարարություն է ընթանում: Ըստ Տիգրան Սարգսյանի, մնում է միայն բնակիչները իրենց ճաշակով հարդարման գույները ընտրեն ու առաջարկեն շինկազմակերպությանը: Այնուհետ անցան քաղաքական հարցերի, լրագրողները հետաքրքրվեցին , թե ճի՞շտ են արդյոք այն խոսակցությունները, որ վարչապետի պաշտոնում շարունակելու է մնալ Տիգրան Սարգսյանը և ինչպե՞ս է վերաբերում իր պաշտոնի համար շրջանառվող թեկնածուներին` օրինակ` Կարեն Կարապետյանին: «Ես ուրախ եմ, որ մեր երկրում կան բազմաթիվ արժանի մարդիկ, որոնք կարող են զբաղեցնել բարձր պաշտոններ», կարճ-կոնկրետ պատասխանեց պարոն Սարգսյանը: Իր վարչապետ մնալ-չմնալու հարցին էլ` թեև խուսափողական պատասխան տվեց, սակայն բարձր տրամադրությամբ` հասկացնելով, որ ինքն է շարունակելու պաշտոնավարել: «Ես պետք ա ասեմ վարչապետ մնալու եմ, թե `չէ, դուք պետք ա ասեք», -ծիծաղեց վարչապետը: Այս հարցից հետո նա խոսեց նաև իր հետագա անելիքներից, օրինակ Գյումրիում ճյուղային արդյունաբերության զարգացումից, որը մեկ անգամ ևս հաստատեց, որ վարչապետը հենց նա է լինելու: Տիգրան Սարգսյանը մասնավորապես ասաց, որ 11 ոլորտից 3 համար արդեն իսկ մասնավոր հատվածի հետ ստորագրել են ծրագրեր ու համաձայնագրեր,և այն ավարտելուց հետո կհանձնեն լրագրողների դատին: Այն հարցին էլ , թե ինչպե՞ս է վերաբերում ԲՀԿ-ի կոալիցիայի մեջ չմտնելուն, կառավարության ղեկավարն ասաց. «Մենք հարգում ենք մեր գործընկերների որոշումը, և վստահ ենք, որ մեր համագործակցությունը շարունակվելու է»: Իսկ թե ԲՀԿ-ն ինչպիսի՞ ընդդիմություն կլինի, վարչապետը այսպես արձագանքեց. «Իսկ ո՞վ ա ասել, որ ԲՀԿ-ն ընդդիմություն կլինի»:
Նունե ԱՐԵՎՇԱՏՅԱՆ
