Aravot.am-ի հետ զրույցում ներկայացնելով իր պատկերացրած նորընտիր խորհրդարանը` քաղաքագետ Գագիկ Համբարյանը կարծիք հայտնեց, որ այն շատ ավելի հետաքրքիր է լինելու, քան նախորդը : «Շատ ավելի հետաքրքիր պառլամենտ կունենաք, եթե Բարգավաճ Հայաստանը մնա այնպիսի կարգավիճակում և այնպիսի քանակով, ինչ որ ստացել է հիմա, այսինքն 37 մանդատով: Նրանց ակտիվությունն ու օրինաստեղծ աշխատանքը կստիպի շատ հանրապետականների, որպեսզի իրենք էլ Ազգային ժողովում ակտիվ օրինաստեղծ գործունությամբ զբաղվեն և մասնակցեն քվեարկությունների:Եթե նախկինում,շատ դեպքերում շատ-շատ հանրապետականներ բացակայում էին, որովհետև այլ կուսակցությունների հետ ունեին կոալիցիա և էդ քվորումը ապահովում էին իրենց կողմից առաջարկված որոշումներն անցնելու համար, էս պարագայում դա կարող է և տեղի չունենալ, որովհետև Բարգավաճ Հայաստանը չի ստանձնել պարտավորություններ էդ օրինագծերին կողմ քվեարկելու համար: Էստեղ պետք է նշենք նաև 5-7 պատգավոր ունեցող մյուս կուսակցություններին և նրանց կուսակցականներին, որոնք ևս շատ ակտիվորեն, ըստ ինձ, կաշխատեն Ազգային ժողովում, էնպես որ Հանրապետականին սպասվում է բավականին ծանր աշխատանք: Այստեղ խնդիրը ոչ նրանում է, որ իրենք պետք է ընդդիմանան օպոզիցիային, այլ ընդհակառակը իրենք իրենց աշխատանքով պետք է ցույց տան , որ իրենք իզուր տեղը չեն ստացել էդքան ձայնը », -ասում է մեր զրուցակիցը: Մեր այն հարցին էլ, թե ուզում եք ասել` այլևս արտոնյալ խավ չի լինի՞ խորհրդարանում, ովքեր անընդհատ բացակա են, գործուղումների մեջ են, մեկը մյուսի տեղն են քվեարկում, մեր զրուցակիցն ասաց. «Ինձ թվում է ավելի զգոն կլինեն, և շատ դեպքերում Հանրապետականին պարտադիր պետք է, որպեսզի իր 69 պատգամավորներից շատ շատերը լինեն Ազգային ժողովի նիստերի դահլիճում, աշխատանքներին մասնակցեն, որովհետև ԱԺ-ն կարևոր ամբիոն է ժողովրդի հետ հաղորդակցվելու»: Քաղաքագետը հուսով է, որ այս անգամվա ԱԺ կլինի մրցակցային, և սրանից կշահի ժողովուրդը, քանի որ պատգամավորները զգոն կլինեն, հաշվի կնստեն ժողովրդի պահանջների հետ , այսուհետ չեն ընդունի այնպիսի օրենքներ,որոնք նոր ծնված լինելով մեռած էին:
Նունե ԱՐԵՎՇԱՏՅԱՆ
