Նրանք իտալիայի դեսպան Բրունո Սկապինիի հրավերով համտեսեցին իտալական ճաշատեսակներ
Մշակույթի նախարար Հասմիկ Պողոսյանը, պարզվեց, եւս իտալական խոհանոցի սիրահար է:
Դեսպան Բրունո Սկապինին (մեջտեղում) իտալական խոհանոցի համտեսը տոնի վերածեց:
Ֆինանսների նախարար Վաչե Գաբրիելյանը՝ իտալական խոհանոցում:
Մասնագետների բնորոշմամբ՝ իտալական խոհանոցին նախապատվություն տվող մարդկանց մոտ 33%-ով նվազում է մահացությունը, 24%-ով էլ ուռուցքային գոյացությունների վտանգը։ Սա բժիշկ-դիետոլոգները բացատրում են իտալական խոհանոցի բաղկացուցիչ մաս կազմող մարսողական խմիչքներով: Արդեն երրորդ տարին է՝ Երեւանում անցկացվում է իտալական խոհանոցի շաբաթ, որի ընթացքում մայրաքաղաքում գործող տասնյակ ռեստորաններ իրենց կերակրացանկում ներառում են Իտալիայի որեւէ երկրամասին հատուկ կերակրատեսակներ: Այս տարի այն կանցկացվի հունիսի 4-ից 10-ը: Իտալական ուտեստին նվիրված փառատոնի նախաձեռնողը Հայաստանում Իտալիայի արտակարգ եւ լիազոր դեսպան Բրունո Սկապինին է: Նախօրեին պարոն Սկապինիի հրավերով «Կոնգրես» հյուրանոցի ամառային այգում իտալական ուտեստներ համտեսելու էին եկել տարբեր ոլորտների ներկայացուցիչներ: Դեսպանի ներկայացմամբ՝ իր այս նախաձեռնության նպատակն է «համախմբել իտալական խոհանոց սիրող մարդկանց»:
Համտեսի համար իտալական պանիրներից, ապուխտից, գինիներից, բանջարեղենից, ծովամթերքից, տավարի, խոզի եւ թռչնի մսից սկսած՝ մինչեւ հատապտուղներ ու պաղպաղակ բերված էին Իտալիայից: Կերակուրները նույնպես իտալացի խոհարարի ձեռքով էին պատրաստված:
Երեկոյան գալա ընթրիքին մասնակցում էին մշակույթի նախարար Հասմիկ Պողոսյանը, ֆինանսների նախարար Վաչե Գաբրիելյանը, ՀՀԿ պատգամավոր Արա Բաբլոյանը, «Ժառանգություն» կուսակցության նախագահ Րաֆֆի Հովհաննիսյանը՝ տիկնոջ հետ, «Արմավիայի» սեփականատեր Միխաիլ Բաղդասարովը եւ այլք:
Իտալիայում ճանաչված խոհարար Էդուարդո Բավիելոն «Առավոտի» հետ զրույցում պատմեց, որ իրենց շատ կերակուրներում օգտագործվում է քերած պարմեզան պանիրը, որը հասունանում է նկուղներում մոտ 2 տարի, ինչի արդյունքում դառնում է չոր եւ փխրուն: Իտալացիները նաեւ տարատեսակ բանջարեղենների ու համեմունքների սիրահար են: Իսկ գինին, խոհարարի խոսքերով, Իտալիայում համարվում է ազգային խմիչք. այն անպակաս է իտալացիների սեղանից եւ մշտապես մատուցվում է տարբեր ճաշատեսակների հետ:
ԼՈՒՍԻՆԵ ԲՈՒԴԱՂՅԱՆ
