Այսօր տարածքային կառավարման փոխնախարար Վաչե Տերտերյանը եկել էր Շիրակի մարզ` գյուղապետերին կիսաընկերական ձեւով նախազգուշացնելու, որ նրանք սկսեն ինտենսիվորեն հավաքագրել սեփական եկամուտները: Վաչե Տերտերյանը մասնավորապես ընդգծեց, որ վիճակը շատ մտահոգիչ է վերջին հինգ ամսվա կտրվածքով: «Կան համայնքներ, որտեղ զրոյական ցուցանիշ է գրանցվել, ինչպե՞ս են ռոճիկ ստացել այդ համայնքի ղեկավարն ու ավագանին,ինչո՞ւ են դոտացիայից աշխատավարձ հատկացրել. հազար ու մի բացատրություն կարելի է տալ, կարող են ասել՝ գարնանացան ենք արել, ընտրություններ ենք անցկացրել, բայց մեկը մյուսի հետ կապ չունի: Ես որպես խնդրանք եմ ձեզ առաջադրում, մենք մի թիմ ենք, հիմա ափսոս է ձեր կատարած աշխատանքը ջուրը լցնեք»,- ասաց փոխնախարարը: Նա տեղեկացրեց, որ համայնքների մեծ մասում սեփական եկամուտների հավաքագրումը 90 տոկոսից իջել է 10, 20, 30 տոկոսի, իսկ ընդհանուր առմամբ՝ Շիրակի մարզում 79,1 տոկոսից իջել է 53,3 տոկոսի: «Ես ձեզանից մեկն եմ ու գիտեմ, որ կախարդական փայտիկով հենց այսօր եկամուտ ապահովելը հնարավոր չէ, բայց այսօրվանից ինտենսիվ պիտի աշխատենք, մենք մարզերում ուզում ենք նորից 10 միլիարդանոց ծրագիր անել, ամսի 15-ին շարժ պիտի լինի»,- գյուղապետերին հստակ ժամանակ տվեց պարոն Տերտերյանը: Փոխնախարարը նաեւ տեղեկացրեց, որ օրենսդրական նոր փաթեթ է մշակվում, որը անպարտաճանաչ հարկատուների նկատմամբ խստացնելու է վարչական պատիժը: «Դուք կպարտավորվեք վարչական ակտ գրել, որպեսզի հետո կարողանաք տելեւիզորը ձեռքից վերցնել, բայց եթե գյուղի 90 տոկոսը դատարաններում հայտնվի ու գնան նրանց ձեռքերից տելեւիզորները վերցնելու, ուրեմն դու էդ գյուղի գյուղապետը չես»,- ակնարկեց փոխնախարարը:
Նրա աչքից ու ականջից հեռու՝ գյուղապետերը մեզ հետ զրույցում համայնքային բյուջեն չհավաքագրելու համար մեղադրում էին հենց կառավարությանը ` ընտրությունների նախաշեմին հողահարկն ու գույքահարկը զիջելու ու այսպիսով բյուջեի գլխին փորձանք բերելու համար: Գյուղապետերի պարզաբանումներին կանդրադառնանք տպագիր «Առավոտի» առաջիկա համարներում:
Նունե ԱՐԵՎՇԱՏՅԱՆ
