«Ես այդ մասին շատ վաղուց եմ ասել, որ ՀԱԿ-ից գնալով մարդիկ կհիասթափվեն եւ կհեռանան: Դրանցից մեկն էլ Դավիթ Շահնազարյանն է եւ կապ չունի, որ նա ՀԱԿ-ի կարկառուն դեմքերից է»,- Aravot.am-ի հետ զրույցում անրադառնալով ՀԱԿ կենտրոնական գրասենյակի անդամ Դավիթ Շահնազարյանի` Կոնգրեսում իր քաղաքական գործունեությունը դադարեցնելու իրողությանն ասաց, ՀՀԿ խմբակցության ղեկավար Գալուստ Սահակյանը: Այն, որ ՀԱԿ-ից կամաց-կամաց սկսեցին հեռանալ նաեւ իրենցից կշիռ ներկայացնող անհատականություններ եւ գործիչներ, մեր զրուցակիցը բնական է համարում. «Երբ քաղաքական թիմը անընդհատ պարտություններ է գրանցում, գնալով մարդիկ պիտի լքեն այդ թիմը, քիչ-քիչ պետք է լուծարվի այդ թիմը: Դա բնական ճանապարհ է եւ քաղաքագիտական պեղումներ կատարելու անհրաժեշտություն չկա»: Հետաքրքրվեցինք` պարոն Սահակյանի տպավորությամբ ՀԱԿ-ը լուծարման փուլո՞ւմ է, նա վերահաստատեց իր միտքը, որ իրար ետեւից պարտություններ գրանցող թիմը, բնականաբար, պետք է մի օր լուծարվի:
Իսկ թե այդ վիճակում գտնվող ՀԱԿ-ն ի՞նչ հավակնություններ կարող է ունենալ առաջիկա նախագահական ընտրություններում, Գալուստ Սահակյանը գտնում է, որ բոլոր այն հավակնությունները, որոնք կարող են ունենալ իրենցից ինչ-որ բան ներկայացնող քաղաքական միավորները կամ գործիչները:
Նելլի ԳՐԻԳՈՐՅԱՆ