Հուլիսի 9-ին ժամը 14.30-ից սահմաններում Իջեւան քաղաքում մոտ 15 րոպե ուժգին փոթորիկ է եղել, որի հետեւանքով քաղաքում արմատախիլ է եղել 7-8 մեծ ծառ, պոկվել են տանիքների ծածկեր:
Իջեւանի քաղաքապետարանի ճարտարապետ Արամ Մելիքսեթյանը «Առավոտի» թղթակցին հայտնեց, որ փոթորկից պոկվել է Մետաղագործների փողոցի թիվ 8 բազմաբնակարան շենքի տանիքի ծածկի մի մասը, Իջեւանի թիվ 3 միջնակարգ դպրոցի մարզադահլիճի ծածկը, Իջեւանի քոլեջի տանիքի մի հատված, քաղաքի սեփական առանձնատներից մեկի ծածկն՝ ամբողջությամբ,մեկ այլ առանձնատան ծածկը՝ կիսով չափ: Քաղաքապետարանի շենքի առաջ արմատախիլ էր եղել մի եղեւնի, եւս երկու մեծ ծառ արմատախիլ էր եղել դրա դիմացի սրճարանում, որն Իջեւանում հայտնի է որպես «Խաժակի սրճարան»: Այստեղ տապալված ծառերն այնքան հաստ էին, որ դրանք բենզասղոցով մասնատելուց հետո, գերանների կտորները մի քանի տղամարդ դժվարությամբ էին գցում բեռնատարի թափք: Իջեւանում անձրեւն ավելի երկար էր տեւել, Աղստեւը վարարել էր, սելավաջրերը հեղեղել են քաղաքի միջով ձգվող միջպետական ճանապարհը:
Կարդացեք նաև
Ոսկան ՍԱՐԳՍՅԱՆ
