Վրաստանում չնայած տնտեսական նկատելի աճին՝ ամբողջ երկրում,այդ թվում նաև Ջավախքում, բարձր է գործազրկության տոկոսն աշխատունակ բնակչության շրջանում: Օգտագործելով ազատ տնտեսական մրցակցության ընձեռնած հնարավորությունները՝ մարդիկ ամեն հնարավորություն օգտագործում են աշխատանք և աշխատատեղեր ստեղծելու ուղղությամբ: Նինոծմինդայում երիտասարդության նախաձեռնությամբ ու ջանքերով ստեղծվել են մեկ տասնյակից ավելի մասնավոր տաքսի ծառայություններ, որոնք սպասարկում են և՛ քաղաքի, և՛ գյուղերի բնակչությանը: Շնորհիվ մասնավոր ձեռնարկչատիրական այս տարածված ձևի՝ հարյուրից ավելի երիտասարդներ հնարավորություն են ստացել աշխատելու, վաստակելու իրենց և իրենց ընտանիքների օրվա հացը: Վրաստանի լիբերալ և շատ ճկուն օրենսդրությունը մեծապես նպաստում է մասնավոր նախաձեռնության ՝ բիզնեսի աճին: Ջավախահայերի համար հարյուրավոր աշխատատեղեր են ստեղծվել թեթև արդյունաբերական արտադրանք թողարկող «Արամ-ԱՆԻ» ֆաբրիկայի գործարկման շնորհիվ: Ջավախքի բնակավայրերի մեծ մասը գազաֆիկացմվել է և երիտասարդության մեծ մասը աշխատանք է գտել գազի սպասարկման ոլորտում: Այս բոլորը նպաստում են երկրամասի սոցիալ-տնտեսական վիճակի կայունացմանը և նկատելիորեն նվազեցնում աշխատունակ բնակչության արտահոսքի կրճատումը:
Վարդուհի Երանոսյան` (mynews.am)
