Ագարակը Սյունիքի մարզի այն եզակի քաղաքներից է, որտեղ արտագաղթ չի նկատվում, քաղաքը զարգացում է ապրում, բակչության թիվը գնալով ավելանում է, ծնունդների թիվը տարեցտարի աճում, նույնիսկ արտասահմանցի` վրացի, ռուս եւ այլ մասնագետներն են իրենց ընտանիքներով հաստատվել քաղաքում` աշխատելով Ագարակի պղնձամոլիբդենային կոմբինատում կամ Հայաստանի Հանրապետությունում ՌԴ անվտանգության դաշնային ծառայության սահմանապահ վարչության Մեղրու սահմանապահ ջոկատում եւ համալրել քաղաքի բնակչության թիվը: Ագարակում բնակիչների թվի ավելացմամբ ու քաղաքի զարգացմամբ` նոր բնակարանների կառուցման խնդիր է առաջացել, քանի որ եղածներն արդեն սկսել են չբավականացնել բնակիչներին:
«Ագարակում բանակարանային խնդիրը գլխավորներից է: Բնակչությունը գնալով աճում է, իսկ վերջին շենքը քաղաքում կառուցվել է 30 տարի առաջ: Քայլեր ենք ձեռնարկվում դրա լուծման ուղղությամբ: Ճանապարհներից մեկն այն է, որպեսզի հիվանդանոցի նախկին շենքը տրամադրվի համայնքին, որից հետո միջին չափերի` 70 ք.մ տարաքծներ կհատկացնենք 30 երիտասարդ ընտանիքների, ովքեր իրենց համար բնակարան կսարքեն այդ տեղանքում: Նախնական պայմանավորվածություն կա նաեւ Ագարակի պղնձամոլիբդենային կոմբինատի հետ, որպեսզի բնակելի շենք կառուցվի իենց կողմից ու հիպոթեքով տրամադրվի կոմբինատի աշխատակիցներին», – ասում է քաղաքապետ Մխիթար Զաքարյանը:
Ագարակցիներն ասում են, որ իրենց մոտ նույնիսկ վարձով տուն գտնելն է պրոբլեմ, իսկ գտնելու դեպքում էլ տների վարձակալության գները բավական թանկ են, մոտ են մայրաքաղաքում գոծող գներին: «1 սենյականոց բնակարանի մեկ ամսվա վարձը 30 կամ 50 հազար դրամից է սկսում, նույնիսկ դժվար է Ագարակում վարձով տուն գտնելը, ազատ տուն գրեթե չկա», -ասում են տեղաբնակները:
Ագարակում ավելացել են նաեւ ծնունդները: Միայն անցած տարի 90 երեխա է ծնվել քաղաքում, տարեցտարի ավելանում է նաեւ մանկապարտեզ հաճախողների թիվը: Ըստ պատասխանատուների, եթե մոտ 10 տարի առաջ Ագարակի մանկապարտեզ 40 երեխա էր հաճախում, ապա այսօր նախակրթարանի սաների թիվը հասնում է 230-ի: Սեպտեմբերի մեկից քաղաքի երեխաները կհաճախեն արդեն նոր տեսք ստացած ու հիմնանորոգված մանկապարտեզ: Ագարակի մանակապարտեզի 2 մասնաշենքերից մեկը ԶՊՄԿ-ի ֆինանսավորմամաբ մայիս ամսվանից սկսվել է հիմնանորոգվել, որի բացումը կարվի սեպտեմբերի մեկին:
Կարդացեք նաև
Մերի ՍՈՂՈՄՈՆՅԱՆ