Հուլիսի 1-ին «Հարսնաքարը» պայթեցնելու գնացած փոխգնդապետ Վարդան Սամվելյանի արարքը «Պահանջում ենք պատժել «Հարսնաքարի» բոլոր մեղավորներին» նախաձեռնության ակտիվիստ Զարուհի Հովհաննիսյանի համար իրենց պայքարը շեղելու նպատակ է ունեցել:
Ակտիվիստի խոսքերով, իր համար այդ պատմության եւ պատճառները, եւ մնացած բոլոր մանրամասներն անհասկանալի են. «Չեմ կարող Սամվելյանին անպատվել, ասել՝ շոու էր, բայց ինձ համար անհավանական պատմություն էր: Արդարությունը պահանջող մարդը կշարունակի պայքարը, արդարության վերահաստատման համար 1500 ձեւ կա: Ինձ թվում է՝ լրատվական հոսքի մեջ սթրես առաջացնելու նպատակ ուներ, որովհետեւ այն ժամանակ մենք սկսեցինք ուղղորդված աշխատել իրավական դաշտում ՝ առանց բռնության մեթոդների: Այդ փաստը մեր պայքարը շեղելու համար էր՝ տեսեք այսպիսի դեպք կա, կարող եք այս մեթոդաբանությամբ աշխատել» : Ակտիվիստ Զ. Հովհաննիսյանին կասկածների տեղիք է տալիս, թե ինչու այսօր Ավան և Նոր Նորք վարչական շրջանների ընդհանուր իրավասության դատարանում Սամվելյանի դեմ հարուցված քրգործով դատավարության ընթացքում գործը քննվում էր ոչ թե «Հարսնաքարը» պայթեցնելու փորձ անելու ուղղությամբ, այլ որ ամբաստանյալն իր ավտոտնակում ապօրինաբար զենք, զինամթերք է պահել. «Ի սկզբանե ասել եմ, որ շատ ծիծաղելի հունով է գնալու, երբեք չեն դատելու որպես «Հարսնաքարի» պայթեցման փորձ անելու համար: Ակտիվիստական շարժումների մեջ բռնության երանգ տալու խնդիր եմ տեսնում, մեր պայքարը շեղելու ու դնելու մի ոճի մեջ, որը մերը չէ»:
Արփինե ՍԻՄՈՆՅԱՆ
