Aravot.am-ը Կոտայքի մարզպետ Կովալենկո Շահգալդյանին խնդրեց մեկնաբանել, թե իր կարծիքով ինչո՞վ էր պայմանավորված Նիկոլ Փաշինյանի այսօրվա զայրույթը: Հիշեցնենք, որ ԱԺ-ում Նիկոլ Փաշինյանը շնորհակալություն հայտնեց նրան, որ բարեհաճել է ժամանել ԱԺ եւ Skype-ով չի ներկայացնում իր հաշվետվությունը, որովհետեւ Կովալենկո Շահգալդյանը հորդորել էր՝ իրենց մարզի մասին տեղեկատվություն ստանալ region.am կայքից:
Մարզպետի մեկնաբանությամբ՝ «Նիկոլ Փաշինյանը սովորաբար ակտիվ պատգամավոր է, կարծում եմ, եւ ուզում էր ցույց տար, որ ինքը ինչ-որ հարցերի տիրապետում է, էլի: Հարց տալն ամենահեշտ գործն է: Ցանկացած մեկին, չլինելով նույնիսկ մասնագետ, հարց կարելի է տալ»: Մեր դիտարկմանը, որ սուր հարցեր տալ ամեն մեկը չի կարող՝ պարոն Շահգալդյանն այսպես արձագանքեց. «Ինչի՞ չի կարող, ամենահեշտ գործն է»:
Մենք խնդրեցինք որեւէ սուր հարց ձեւակերպել եւ տալ Նիկոլ Փաշինյանին: Մարզպետի խոսքերով՝ «Ուզում էի հարց տալ՝ փախավ: Ուզում էի հարցնել՝ ո՞նց ես քեզ պահել ազատազրկման վայրում»: Մենք փորձեցինք ճշտել՝ իսկ ո՞նց է իրեն պահել, ինչ-որ տեղեկություններ ունե՞ք: Մարզպետը չմանրամասնեց, ի պատասխան՝ միայն խորհրդավոր ժպտաց:
Հռիփսիմե ՋԵԲԵՋՅԱՆ
