Քաղաքական գործիչ, «Հանրապետություն» կուսակցության քաղաքական խորհրդի նախկին անդամ Սուրեն Սուրենյանցն, անդրադառնալով խարդախությամբ ուրիշի գույքը հափշտակելու դիտավորությամբ եւ դրան տիրանալու համար իր դեմ հարուցված քրեական գործին, վստահեցրեց՝ լուրջ խնդիր չկա:
Հիշեցնենք, որ ըստ մեղադրանքի, նա տիրացել է այս գործով տուժող Գրիգոր Ղասաբյանի 508 հազար ՀՀ դրամին։ «Ես եւ տուժողը գործի մեջ հայտնվել ենք ակամայից: Ավելի մանրամասներ չեմ ուզում ասել: Ես ու տուժողը շատ նորմալ շփվում ենք, ոչ մի խնդիր չկա: Այլ մարդկանց հարաբերությունների պատճառով հայտնվել ենք այս վիճակում: Ոչ մի կրմինալ ոչ՝ իմ, ոչ ՝ տուժողի , ոչ էլ որեւէ մեկի մոտ չկա: Երեւի ես ու տուժողը այլ մարդկանց շատ ենք վստահել, դրա համար էլ այս խնդիրներն են առաջացել: Որոշակի ֆինանսական խնդիր կա, որը այս պահին լուծվում է. մի հազար դոլարի կարգի խնդիր է: Իրականում շատ պարզ ֆինանսական խնդիր է՝ առանց քրեական բաղկացուցիչների: Ես ու տուժողը համաձայնության ենք եկել»,- Aravot.am-ին պարզաբանեց պարոն Սուրենյանցը՝ չմանրամասնելով ինչ համաձայնության է տուժողի հետ եկել, ու ովքեր են այլ անձինք, որոնց վստահելու արդյունքում հայտնվել է դատարանում:
Հիշեցնենք, որ սեպտեմբերի 18-ին Արաբկիր, Քանաքեռ-Զեյթուն վարչական շրջանների ընդհանուր իրավասության դատարանում դատական առաջին նիստը հետաձգվեց մեղադրողի դատարան չներկայանալու պատճառով, եւ այն նշանակվեց վաղը՝ հոկտեմբերի 2-ին։
Պարոն Սուրենյանցի նկատմամբ խափանման միջոց է ընտրվել ստորագրությունը քաղաքից չբացակայելու մասին։
Կարդացեք նաև
Արփինե ՍԻՄՈՆՅԱՆ
