«Նոր ժամանակներ» կուսակցության նախագահ Արամ Կարապետյանի համոզմամբ, ՀՀ նախագահ Սերժ Սարգսյանի վերջին այցելությունները տարբեր գերատեսչություններ միայն իր PR-ն անելու համար չէ: «Փող չկա, վարկերը չեն տալիս: Հայաստանի վիճակը ֆինանսական մասով ծանր է: Խորհրդակցություններ է անում՝ ասում է բյուջեի փողը մի գողացեք, վիճակն, իսկապես վատ է: Բոլոր ծախսատար ճյուղերում ասում են` մի գողացեք, եթե այսպես շարունակվի փողերը չեն հերիքելու: Բայց 4 տարի հետո պետք չէր այս մասին հիշել, այլ հենց սկզբից: Ինչո՞ւ է Սերժ Սարգսյանն ակտիվացել միայն հիմա՝ ընտրություններից առաջ», -ասաց պարոն Կարապետյանը՝ շարունակելով,- «Նախագահը հայտարարում էր գլխից պիտի բռնենք, բայց ինքը խոսում էր իր դեմ: Համակարգի գլխավոր դերակատարը ինքն է, ու գլխից պետք է սկսեին հենց իրենից: Գերատեսչությունների մակարդակով գուցե ինչ-որ մասով հասկանալի է դառնում, որ գլխից բռնել ասելով նկատի ուներ՝ հասեք մինչեւ նախարարներ, բայց ո՞ր նախարարներ: Իմ տեսակետից մինչեւ այն նախարարների, որոնք «Բարգավաճ Հայաստանի» պատասխանատուներն են եղել ժամանակին: Խաչիկյանին էլ բերեցին, որ հավասարակշռությունը պահպանեն՝ մերոնք-ձերոնք: Արդեն ակնհայտ է, որ շուտով ԲՀԿ-ի նկատմամբ հարկային խնդիրներ էլ են ծագելու»:
Արփինե ՍԻՄՈՆՅԱՆ
