Այսօր Կապանում մարզի ակտիվ երիտասարդների, բարձրագույն եւ միջնակարգ ուսումնական հաստատությունների ուսանողների, ուսխորհուրդների նախագահների հետ քննարկվեցին եւ վեր հանվեցին մարզի երիտասարդության հիմնախնդիրները, բարձրացվեցին առաջարկներ, որոնք հետագայում պետք է հաշվի առնվեն եւ տեղ գտնեն ՀՀ սպորտի եւ երիտասարդության հարցերի նախարարության կողմից երիտասարդության ակտիվ գործունեության խթանմանն ուղղված եւ աշխատանքների կանոնակարգման նպատակով մշակվող նոր ռազմավարության մեջ: Այդ նախագծի հիման վրա էլ կառավարության կողմից որոշում կհաստատվի:
ՀՀ սպորտի եւ երիտասարդության հարցերի նախարարության երիտասարդական քաղաքականության վարչության պետ Արմեն Պապյանը նշեց, որ նոր նախագիծը պետք է լինի իրատեսական, քանի որ 2008-2012թթ.-ի համար մշակված ռազմավարության մի շարք կետեր դժվար իրականանալի էին կամ անիրականանալի: «Մեր նախարարության աշխատակիցներից, միջազգային կառույցների, հ/կ-ների ներկայացուցիչներից բաղկացած աշխատանքային խումը գրեթե 3 շաբաթ աշխատելուց հետո ուրվագծեց հիմնական գերակայությունները նոր ռազմավարության եւ միջոցառումների հիմնական շրջանակը, որով մենք պատրաստվում ենք քննարկումներ կազմակերպենք ոչ միայն Սյունիքի մարզում, այլեւ` հանրապետության մյուս մարզերում, եւ տեղերում կլսենք երիտասարդության հուզող հիմնախնդիրները, նախագծի վերաբերյալ առաջարկություններ ու գաղափարներ», – նշեց պարոն Պապյանը: Իսկ Կապանում կազմակերպված քննարկման ժամանակ հարցերն ու առաջարկները տարբեր էին, սկսած երիտասարդության զբաղվածության խնդիրներից` մինչեւ ինֆորմացիոն դաշտի սուղ լինելը: Որպես հեռավոր մարզ, Սյունիքի երիտասարդությունը չի տիրապետում լիարժեք իֆորմացիայի եւ իրականացվող շատ-շատ ծրագրերի, որի պատճառով հետ է ընկնում մայրաքաղաքի եւ մոտակա մարզերի երիտասարդությունից:
«Շփվելով երիտասարդության հետ` ես կարող եմ համոզված ասել, որ այստեղ կա որակյալ ռեսուրս, ինտելեկտով եւ մի շարք այլ հարցերով մենք գերազանցում ենք մայրաքաղաքի երիտասարդությանը, մնում է հնարավորություններ ստեղծվեն եւ մեր մարզի, մեր քաղաքի երիտասարդությունը շատ ու շատ բարձունքների կհասնի: Կարեւորն այն է, որ ինֆորմացիան ու ծրագրերը չկենտրոնացվեն մայրաքաղաքում ու մոտակա մարզերում, այլ տեղափոխվեն նաեւ հեռավոր այս մարզ», – ասաց Հայաստանի երիտասարդական հիմնադրամի Սյունիքի մարզային կենտրոնի աշխատակից, համակարգողի օգնական Տիգրան Մկրտչյանը: Քննարկման ժամանակ բարձրացվեց նաեւ մեկ շատ կարեւոր հարց, որ այլընտրանքային տարբերակ մշակվեր, որպեսզի բուհն ավարտած ու առանց աշխատանքի մնացած երիտասարդների աշխատանքի ընդունման հարցը լուծվեր պետության միջնորդությամբ: Եթե նախկինում ուսանողն ավարտելուց հետո գործուղվում էր տարբեր գործարաններում աշխատելու առանց աշխատանքային փորձ ունենալու` «երիտասարդ մասնագետ» կարգավիճակ ստանալով, ապա ներկայումս բուհն ավարտած ուսանողը չի կարողանում առանց համապատասխան փորձի աշխատանք գտնել, քանի որ գործատուները պահանջում են փորձառու մասնագետներ: Առաջարկ եղավ նախկինի պես պայմանավորվածություններ ձեռք բերվեր գործատուների եւ բուհերի միջեւ, թեեւ ներկայիս շուկայական պայմաններում դա բարդ կլինի, բայց հնարավոր է մոտեցման նոր ձեւ մշակել եւ երիտասարդությանը մտահոգող զբաղվածության հիմնախնդիրը հնարավորինս լուծել: Մասնակիցներից մեկն անկեղծացավ, որ բանակից վերադարձել է եւ շինարարի իր մասնագիտությամբ երկար ժամանակ է աշխատանք չի կարողանում գտնել, նույնիսկ` որպես պրակտիկանտ է փորձել աշխատել շինարարական կամզակերպություններում, շատերի դռներն է բախել, բայց բոլորի կողմից մերժում է ստացել, պատճառաբանել են, որ չեն կարող նրան ընդունել, քանի որ պետք է հավելյալ հարկեր վճարեն պետությանը:
Մերի ՍՈՂՈՄՈՆՅԱՆ
Կարդացեք նաև
