«Աշխարհում 24-րդ տարին է, որ դեկտեմբերի 1-ը հայտարարված է եւ նշվում է, որպես ՁԻԱՀ-ի դեմ պայքարի համաշխարհային օր»,-այսօր Aravot.am-ի հետ զրույցում նշեց «Հանրային տեղեկատվության եւ գիտելիքի կարիք» ՀԿ-ի անդամ Մարինե Մարգարյանը:
Նրա պնդմամբ՝ կանխարգելում եւ բուժում, զրո խտրականություն, զրո նոր դեպքեր, զրո մահ` սա է ՁԻԱՀ-ի դեմ պայքարի համաշխարհային օրվա հիմնական ուղերձը.
«Միջոցառման նպատակն է հանրության ուշադրությունը բեւեռել ՄԻԱՎ-ի եւ ՁԻԱՀ-ի խնդիրներին եւ բարձրացնել ՄԻԱՎ-ի վերաբերյալ տեղեկացվածությունը: Մեկ օրով չես կարող իրականացնել ամբողջ հանրապետությունում կանխարգելում ՄԻԱՎ-ի, սակայն իրազեկման այս ձեւը նույնպես ընդունելի է»:
Շոումեն, ռադիոհաղորդավար Եգոր Գլումովի խոսքով հարկավոր է հաճույք ստանալ կյանքից.
«ՄԻԱՎ-ով վարակված մարդիկ պետք է հասկանան, որ ավելի շատ իրենք պետք է դրա մասին խոսեն: Նրանք ունեն նույն իրավունքները ինչ մենք: Այսօր մենք վախենում ենք`վախենում ենք գնալ բանակ ծառայել, ամուսնության առաջին գիշերից, բաժանումից, պետք է հասկանանք, որ շատ կարճ ենք ապրում»:
«ՁԻԱՀ»-ի խնդրի ջատագովության խումբը միանալով ՁԻԱՀ-ի դեմ պայքարի համաշխարհային օրվա միջոցառումներին եւ «Հասնել Զրո-ի» համաշխարհային կարգախոսին, կազմակերպել էր ինտերակտիվ հանրային միջոցառում /վիկտորինա/:
Դավիթ Ամալյանը, Կարեն Ջանիբեկյանը, Սոս Ջանիբեկյանը, Արման Նշանյանը եւ հանրային ճանաչում եւ սեր վայելող այլ մարդիկ ներկա էին միջոցառմանը եւ իրենց ներդրումն ունեցան ՄԻԱՎ-ի կանխարգելման գործում:
Հայաստանում այսօր ՄԻԱՎ-ով ապրող մարդկանց հաշվարկային թիվը կազմում է 3500:
Անժելա ՇԱՀՈՒՄՅԱՆ
