Կալինինգրադում մեկնարկել է բռնցքամարտի Եվրոպայի 19-20 տարեկանների անդրանիկ առաջնությունը, որին մասնակցելու հայտ ներկայացրած 30 երկրների մեջ է նաեւ Հայաստանը:
Կալինինգրադում որոշվելու են ոչ միայն այդ տարիքային խմբի Եվրոպայի առաջին չեմպիոններն ու մեդալակիրները, այլեւ ընտրվելու են եկող տարվա ամռանը Կազանում կայանալիք 27-րդ համաշխարհային ուսանողական խաղերի մասնակիցները: Մեր հանրապետությունը ներկայացնում են ԿորյունՍողոմոնյանը՝ 49 կգ, Նարեկ Աբգարյանը՝ 52, Արամ Ավագյանը՝ 56, Հովհաննես Բաչկովը՝ 60, Արթուր Քիրաջյանը՝ 64, Հրայր Մաթեւոսյանը՝ 69 եւ Արմեն Սիմոնյանը՝ +91:
Մեկնարկային օրը Հրայր Մաթեւոսյանը միավորների 10-14 տարբերությամբ զիջել է Վրաստանի ներկայացուցիչ Զահալ Քվաչատաձեին:
Իսկ ահա նույն քաշային կարգում Գերմանիան ներկայացնող Արայիկ Մուրադյանը պայքարից դուրս է թողել մոլդովացի Վալերի Սիբրուին:
Այսօր Կալինինգրադի ռինգ մտնելու են Հայաստանի եւս չորս բռնցքամարտիկներ: Նրանց զույգերն են. 49 կգ՝ Կորյուն Սողոմոնյան- Նազար Կուրոտչին (Ուկրաինա), 52 կգ՝ Նարեկ Աբգարյան-Դմիտրի Ստրիգելսկի (Բելառուս), 60կգ՝ Հովհաննես Բաչկով-Էլվին Իսաեւ, 64կգ՝ Արթուր Քիրաջյան-Ջոզեֆ Հերչեկ (Հունգարիա):
Աշոտ ՀԱԿՈԲՅԱՆ
