ԱԺ-ում ՀՀ նախագահի նախկին մշտական ներկայացուցիչ, նախկին դաշնակցական պատգամավոր Գառնիկ Իսագուլյանը թերահավատորեն է վերաբերվում նախկին գործընկերոջ` Հովիկ Աղազարյանի նախագահի թեկնածու առաջադրվելուն:
«Լո՞ւրջ եք ասում, որ առաջադրվել է: Ամանորի կատակ են ասում դրան: Հովիկը կատակ անելու մեծ սիրահար է, պատգամավոր եղած ժամանակ էլ նման կատակներ էր անում, հիմա էլ է հաստատ կատակ արել: Նա քաղաքական թիմ չունի, վերջին 10 տարիներին քաղաքական գործունեությամբ չի զբաղվել»,- Aravot.am-ին ասաց պարոն Իսագուլյանը:
Որպես նախագահի թեկնածու, պարոն Իսագուլյանը նախկին գործընկերոջը չի տեսնում. «Դե հիմա Հայաստանում այնպիսի իրավիճակ է ստեղծվել, որ ով ասեք` իրեն նախագահի թեկնածու է առաջադրում: Աստված մի արասցե՝ բա որ այս կատակը լուրջ դառնա ու մարդ է, մեկ էլ տեսար, հաղթի: Իրավունք չունենք հայկական նախագահական ընտրությունները վերածել այս կարգի ֆարսի, իրավունք չունենք այդքան իջեցնել, դարձնել ծիծաղի առարկա: Ընկերական խորհուրդ կտայի Հովիկին չգնալ այդ խաղին, չխառնվել մանր խաղի: Առավել եւս պարզ ասեմ, որ այդ մարդը հաստատապես վերջին 10 տարում Հայաստանում չի բնակվել»:
Պարոն Իսագուլյանի կարծիքով, նախագահի լուրջ թեկնածուներ չեն նաեւ Մարտիկ Սարգսյանը, էպոսագետ Վարդան Սեդրակյանը. «Լավ, ամոթ է, չէ՞: Էպոսագետի հետ զրուցել եմ, նա անգամ չի հասկանում էպոսի իմաստն ամբողջությամբ: Մարտիկ Սարգսյանն էլ պարզ գյուղացի է, հետո՞»:
Կարդացեք նաև
Արփինե ՍԻՄՈՆՅԱՆ
