Այսօր Կամերային երաժշտական թատրոնում կայացավ ՀՀ վաստակավոր արտիստ Դավիթ Հակոբյանի բեմադրած «Սեքսուալ խառնաշփոթ հյուրանոցում» ներկայացման պրեմիեան` ըստ Ռեյ Կունիի գործի: Երկու գործողությամբ ներկայացումը դրական հույզեր եւ լիաթոք ծիծաղ կորզեց հանդիսատեսից, այն բավականին հաջողված էր, դինամիկ, գրագետ երաժշտական ձեւավորմամբ ( Արմեն Մարգարյան), իսկ դերասանական բույրը հրաշալի «մարսել» էր թեման: Բեմադրության մեջ ներգրավված էին Արա Դեղտրիկյանը, Արմեն Մարգարյանը, Սուրեն Առուստամյանը, Գայանե Ավետիսյանը, Արտակ Հովասափյանը, Տաթեւ Այվազյանը, Կարինե Ծատուրյանը, Ներսես Մարկոսյանը, Լաուրա Բաբայանը, Կարինե Ծատուրյանը եւ ուրիշներ:
Անգլիացի դրամատուրգի պիեսն էլ հետաքրքիր էր` վարչապետի օգնական Ռիչարդ Ուիլը սիրավեպ ունի ընդդիմության առաջնորդի քարտուղարուհու հետ եւ եթե բռնվի` կորած է: Ասում է`այդ պարագայում անգամ մարքսիստներն ավելի շատ ձայներ կստանան ընտրություններում, քան իր հարազատ կուսակցությունը: Ուիլը սենյակ է վարձակալում իր եւ քարտուղարուհու համար, բայց մեկ էլ պատշգամբում դիակ է հայտնաբերում, որին պետք է «չեզոքացնել» օգնականի միջոցով: Արդյունքում ամեն ինչ խառնվում է իրար, ստեղծվում են ծիծաղելի իրավիճակներ, երբ պարզվում է, որ «դիակը» ամենեւին էլ դիակ չէ , այլ ընդդիմության առաջնորդի քարտուղարուհու խանդոտ փականագործ ամուսնու վարձած մասնավոր խուզարկուն է:
Գոհար ՀԱԿՈԲՅԱՆ
