ԱԺ ՀԱԿ պատգամավոր Լյուդմիլա Սարգսյանի գնահատմամբ, ՀԱԿ պատգամավոր Հրանտ Բագրատյանը շտապել է առաջադրվելու մասին հայտարարելու հարցում:
«Լավ կլիներ, եթե Բագրատյանը սպասեր Լեւոն Տեր-Պետրոսյանի որոշմանը, հետո որոշեր առաջադրվելու հարցը քննարկել կամ ՀԱԿ-ի քաղխորհրդում կամ էլ ինքնառաջադրման որոշում կայացներ: Լավ կլիներ, որ ամեն ինչ փոխհամաձայնեցված լիներ»,-Aravot.am-ին ասաց տիկին Սարգսյանը:
Մեր հարցին, պարոն Բագրատյանի քայլը ՀԱԿ-ում դավաճանություն համարո՞ւմ են, տիկին Սարգսյանն ասաց. «Հույս ունեմ, որ Լեւոն Տեր-Պետրոսյանի առաջադրման դեպքում Հրանտ Բագրատյանն իր որոշումը կփոխի: Մենք գործընկերներ ենք եղել, նաեւ ընկերներ: Չեմ շտապում գնահատականներ տալ, գտնում եմ, որ ճիշտ կլիներ սպասելը»: Նա նաեւ չհամաձայնեց, թե ՀԱԿ-ի ներսում գործիչների առաջարկները, տեսակետները կամ ներկայացրած ծրագրերը խմբագրվում են եւ անդրադառնալով «այսօր «Ազատություն» կուսակցության համագումարի ժամանակ պարոն Բագրատյանն ակնարկին՝ « Բայց վերջապես մենք ունենք մեր տեսակետները, եւ դուք այսօր կլսեք: Դուք կլսեք, որ դրանք էականորեն տարբերվում են: Այսօր դուք կլսեք մաքուր ձեւով ե՛ւ տնտեսական, ե՛ւ քաղաքական ծրագրերի մասին: Այսինքն՝ չխմբագրված այն տարբերակով, որովհետեւ ՀԱԿ-ում բնական է, պիտի խմբագրվեին», կրկին ասաց՝ չեմ ուզում գնահատականներ տալ:
ՀԱԿ պատգամավորը վստահեցրեց, որ բոլորը անհամբեր սպասում են ՀԱԿ առաջնորդի առաջադրմանը, իսկ ՀԱԿ-ի կազմաքանդման մասին խոսակցություններն իրականությանը չեն համապատասխանում. «Միայն նրա առաջադրման դեպքում է, որ մենք ռեալ շանսեր ունենք ձեռնոց նետելու գործող վարչախմբին եւ հաղթանակի հնարավորություն»:
Կարդացեք նաև
Արփինե ՍԻՄՈՆՅԱՆ
