Գործարար համբավի պաշտպանության համար անցյալ տարվա հուլիսի 30-ին Երեւանի Մալաթիա-Սեբաստիա վարչական շրջանների ընդհանուր իրավասության դատարան էր դիմել առողջապահության նախարարության թիվ 3 կլինիկական հիվանդանոցը՝ իր ներկայացուցիչ, ՀՀ փաստաբանների պալատի անդամ Մուրադ Ասրյանի միջոցով:
Հայցվորը տեղեկացնում է, որ պատասխանող, իրավաբան՝ այժմ նախագահի թեկնածու առաջադրված Ռուբեն Այվազյանն անցյալ տարվա մայիսի 22-ին լրատվամիջոցներին հիվանդանոցի դեմ «Վարկած» ակումբում տվել է զրպարտչական բնույթի տեղեկատվություն:
Հայցվորը գրությամբ հունիսի 22-ին դիմել է պատասխանողին, պահանջել, որպեսզի վերոհիշյալ տեղեկատվությունը հերքվի:
Հուլիսի 4-ին պատասխանողը, ըստ հայցվորի, կրկին «Վարկածում» լրատվամիջոցներին ներկայացրել է տեղեկատվություն, որն իր մեջ պարունակում է զրպարտություն:
Կարդացեք նաև
«Առավոտն» անդրադարձել է ակնարկված ասուլիսներին: Մասնավորապես, պատասխանողը լրատվամիջոցներին հայտնել էր, որ նշյալ բուժհիմնարկում իր հորը՝ ճարտարագետ, «Կալաշնիկով» ինքնաձիգի փամփուշտի արտադրության ավտոմատ հոսքագծի նախագծող Լեւ Այվազյանին մայիսի 12-ին պատշաճ բժշկական օգնություն ցույց չտալով՝ «առանձնապես դաժանությամբ սպանել են»:
Ի դեպ, պատասխանողը հակընդդեմ հայցով դիմել էր դատարան, պահանջելով հատուցել «հորն առանձնապես դաժանությամբ սպանելու հետեւանքով հուղարկավորության ծախսերը»: Այն հաշվարկվել է 2 միլիոն 500 000 դրամ: Հակընդդեմ հայցը մերժվել էր, բողոքը հասել էր ՀՀ վերաքննիչ, ապա՝ վճռաբեկ դատարաններ եւ այն վերադարձվել էր:
Մալաթիա-Սեբաստիա վարչական շրջանի ընդհանուր իրավասության դատարանն անցյալ տարվա դեկտեմբերի 18-ին քննության առավ Ռուբեն Այվազյանի միջնորդությունը՝ հայցի ապահովման միջոցը ՝ գույքի վրա 1 մլն դրամի չափով արգելանքը վերացնելու մասին:
Դատարաը մերժել էր այս միջնորդությունը, գտնելով, որ հայցի ապահովման միջոցի վերացման հիմքերը բացակայում են:
Ի դեպ, ոստիկանության Կենտրոնականի քննչական բաժնում հարուցված քրեական գործի շրջանակներում առկա է նաեւ ԱՆ դատական բժշկության գիտագործնական կենտրոնի թիվ 118/հձ եզրակացությունը, որը հղում անելով հիվանդության պատմագրին, հանգել է այն եզրակացության, թե հարցում նշված հանգամանքները ենթակա են քննչական գնահատման:
Ռուզան ՄԻՆԱՍՅԱՆ
