Նախագահի կարատեիստ թեկնածու Տարոն Աբրահամյանի օրակարգում ոչ միայն ընտրական 8 միլիոն դրամ գրավը գտնելու, այլեւ նախընտրական քարոզարշավի կազմակերպման ու անցկացման համար գումար հավաքելու խնդիրն է դրված:
«Մենք սպասում ենք հավելյալ գումարների, որ կարողանանք քարոզարշավը կազմակերպել: Նախատեսում ենք ծախսել 25-50 միլիոն դրամ , որովհետեւ դա պարտադիր սխեմա է՝ աշխատողներին աշխատավարձ տալ, գույք ձեռքբերել եւ այլն»,- ասաց նախագահի թեկնածուն: Ըստ նրա, ընտրություններին մասնակցելու համար իրեն ֆինանսավորում են ընկերները:
Նրա խոսքերով, գումարը հավաքագրելու համար այսօր առավոտվանից հնարավոր ընտրողների հետ հանդիպումներ են կազմակերպում:
«Ունեմ ծրագիր, բայց երբ ֆինանսական խնդիրները լուծվեն՝ հետո կներկայացնեմ »,- ասում է իր նախընտրական ծրագիրն առայժմ թաքցնող թեկնածուն, հետո շարունակում. «Հանրապետությունը ինձ վաղուց է ճանաչում: 1980-ականներից սպորտում եմ, բազմաթիվ սպորտաձեւերում եղել եմ չեմպիոն, մարտարվեստի միջազգային վարպետ եմ, օլիմպիական դեսպան եմ: Եղել եմ հատուկ նշանակության գումարտակի հրամանատարի պաշտոնակատար»:
Կարդացեք նաև
Նա չի կարծում, թե ընտրությունների արդյունքներն արդեն կանխորոշված են. «Գործող նախագահն ունի պետական մեծ մեխանիզմներ, պատերազմի բոհով անցել է , ճանաչված անձ է, հարգում են: Առավելությունները շատ մեծ են, բայց դա վերցնել հիմք ու ընթացք տալ, թե նախագահն արդեն նախագահ է, չի կարելի»:
Նա արդեն ունի նախընտրական 2 կարգախոս՝ «Մենք հայ ենք, հզոր ենք, մեր ազգի արժանի զավակներն ենք» եւ «Կեցցե միասնական, մարմնահզոր, ուժեղ Հայաստանը»:
Հարցին, թե ինչո՞ւ միանգամից նախագահի թեկնածու, գուցե սկզբում ուժերը փորձեր սպորտի եւ երիտասարդության հարցերով նախարարի պաշտոնում, կարատեիստն ասաց. «Նախարարության հնարավորություններն առավել քիչ են… փորձել եմ հասնել այդ արենային, բայց եղել է հնարավորությունների սահմանափակում»:
Հարցին ի պատասխան՝ պատրաստվո՞ւմ է մեծ քաղաքականություն մտնել, եթե չհաղթի ընտրություններում, ասաց. «Քաղաքականություն չեմ մտնում, որովհետեւ նախագահի պաշտոնը քաղաքականության հետ կապ չունի»:
Արփինե ՍԻՄՈՆՅԱՆ
