«Օօօօօ~: Երկուշաբթի օրը ձեզ հրավիրում եմ Կենտրոն եւ Նորք –Մարաշ դատարան: Ինձ դատում են»,- այսօր ասուլիսից հետո Քաղաքագետների միության նախագահ Հմայակ Հովհաննիսյանը այսպես ողջունեց ՀՀԿ խմբակցության ղեկավար Գալուստ Սահակյանին, երբ նրան պատահաբար հանդիպեց ակումբի դռների մոտ:
Հմայակ Հովհաննիսյանը սկսեց ամենայն մանրամասնությամբ պատմել քրգործի մանրամասները, տեղեկացնել վկաների մասին ու օգնության կանչել Գալուստ Սահակյանին. «Լիսկան մարդամեջում ծեծել է կնոջը, դա տեսագրվել է, էն մյուսը ծեծել է նրան, իսկ ես, որ ոչինչ չեմ արել…արի դե, մասնակցի դատին, տես մատ եմ ջարդե~լ, ի~նչ եմ արել: Մի ծիծաղելի բան է, գրոտեսկ է: Իհարկե, բռնապետությունը գրոտեսկային իրավիճակ է ստեղծում»:
Հմայակ Հովհաննիսյանին մեղադրանք է առաջադրվել միջին աստիճանի մարմնական վնասվածք պատճառելու համար` Սենիկ Ջուլհակյանի հետ ունեցած նրա շենքային խնդիրների համար:
Մեր հարցին` նմա՞ն է Հմայակ Հովհաննիսյանը միջին ծանրության վնասվածք պատճառողի` Գալուստ Սահակյանը պատասխանեց. «Նա թաքնված է»:
Կարդացեք նաև
Այդ ընթացքում Հմայակ Հովհաննիսյանը Գալուստ Սահակյանին փորձում էր համոզել, որ ինքն անմեղ է. «Մատով չեմ կպել: Այ մարդ, ոչ մարդու իրավունքների պաշտպան գոյություն ունի: Խոչընդոտում են իմ իրավունքը: Պրովոկացիա են անում, ինձ նկարում են, գցում են youtube, այնտեղ պարզ երեւում է, որ ես իրեն մատով չեմ կպել, ցուցմունքը գրում է, որ մատը մնացել է դռան հետեւում, վնասվել է: Մի քանի օրից իրեն վերեւից ասել են` էդ ի՞նչ ես անում, տո կեղծ վկայություն տուր, մենք տեր ենք»:
Գալուստ Սահակյանը հետաքրքրվեց` վկա կա՞: Հմայակ Հովհաննիսյանն ասաց` այո, բայց վկաները նույն բառերով բոլորը գրել են նույն նախադասությունները, կեղծ վկայություններ են տվել. «Եթե նորմալ երկրում ապրեինք, նրանք պետք է պատասխան տան: Էդ Սենիկ-Ներսիկ…»:
Որքան էլ Հմայակ Հովհաննիսյանը փորձեց պատասխան ստանալ` աջակցելո՞ւ է իրեն ՀՀԿ խմբակցության ղեկավարը, գոնե գալո՞ւ է իր դատին` Գալուստ Սահակյանը ոչ մի խոստում չտվեց:
Հռիփսիմե ՋԵԲԵՋՅԱՆ
