Իսկ հանցագործությունների դեմ պայքարի արդյունավետության համար ոստիկաններին արտերկիր կգործուղեն:
Վաղը կառավարության հերթական նիստում ոստիկանապետ Վլադիմիր Գասպարյանը կներկայացնի ոuտիկանության գործունեության ոլորտում 2013-2014 թվականների բարեփոխումների ծրագիրն ու ժամանակացույցը, որին հավանություն կտրվի:
Ըստ կառավարություն ներկայացվող փաստաթղթի, ծրագրով նախատեսվում է ստեղծել նոր ստորաբաժանումներ, ամբողջ հանրապետությունում ներդնել համայնքային ոստիկանության մոդելը, կառուցել համայնքային ոստիկանության նոր հենակետեր, հստակեցնել ոստիկանությունում անցումը հատուկ քաղաքացիական ծառայության, կատարել ոստիկանության ծառայողների հաստիքների վերաբաշխում, հանցագործությունների դեմ պայքարի արդյունավետության բարձրացմանն ուղղված բարեփոխումների շրջանակներում նախատեսվում է համապատասխան իրավական ակտերի մշակում, անհրաժեշտ սարքերի ձեռքբերում, ոստիկանության ծառայողների վերպատրաստման ապահովում տարբեր երկրներում: Նույն ծրագրի շրջանակներում ոստիկանության աշխատանքային պայմանների բարելավման համար, ինչպես նշված է կառավարության կայքէջում, նոր տրանսպորտային միջոցներ ձեռք կբերվեն, եղածներն էլ` կթարմացվեն, սերվերային համակարգեր կներդրվեն, ոստիկանության ստորաբաժանումների շենքային պայմաններն էլ կբարելավվեն: Ոստիկանների սոցիալական եւ իրավական պաշտպանությանն ուղղված բարեփոխումներով էլ նախատեսվում է նրանց համար որոշակի սոցիալական արտոնություններ. Թոշակառու ոստիկաններին բժշկական հաստատություններ եւ առողջարանային բուժման ուղեգրելու նոր հնարավորություններ կստեղծեն:
Կալանավորված Գագիկ Պապոյանի «Գապբնակշին» ընկերության կողմից կառուցված Արամի 72-80 հասցեների շենքերի պահպանության համար վաղը կառավարությունը որոշելու է ոստիկանության պետական պահպանության գլխավոր վարչության N 3 ռազմականացված ջոկատին հատկացնել 7,073,640 դրամ`ամսական` 1,178,940: Այս մասին նշված է կառավարության նիստի օրակարգում: Նախագծի հիմնավորման մեջ էլ նշված է, որ ֆինանսավորումը նախատեսվում է կրկին իրականացնել կառավարության 01.03.2012թ թիվ 223-Ա որոշման համաձայն բացված արտաբյուջետային հաշվից` կառուցապատողներից հավաքագրվող վերգետնյա վճարներից:
Կարդացեք նաև
Նելլի ԲԱԲԱՅԱՆ
