Իրավապաշտպան Մարո Մաթոսյանի կարծիքով` հայկական ընտանիքներում առկա են մանկապղծության, ինցեստի եւ սեռական ոտնձգության այլ արատավոր դեպքեր:
Հայաստանում 2012 թվականին հինգ կին է մահացել ընտանեկան բռնությունից: Կանանց իրավունքները պաշտպանող կազմակերպություններից միայն մեկի թեժ գծի երկու հեռախոսահամարներին անցած տարի ստացվել է 2832 զանգ, որից 1845-ը վերաբերվել է ընտանեկան բռնությանը: Այսօր Մարդու իրավունքների պաշտպանի
գրասենյակում կայացած ասուլիսի ժամանակ հայտնեցին Հայաստանում կանանց իրավունքներով զբաղվող եւ ընտանեկան բռնություններին դեմ հանդես եկող երեք կազմակերպությունների տնօրեններ:
«Ինչքա՞ն պիտի հայ կինը ունենա կոտրված ոսկորներ, ինչքա՞ն պիտի հայ կինը ծեծվի, տանից կեսգիշերին փախչի»,- հռետորական հարց ուղղեց «Կանանց աջակցության կենտրոն» հ/կ-ի տնօրեն Մարո Մաթոսյանը:
Կարդացեք նաև
Հասարակական կազմակերպությունների ներկայացուցիչները զարմացած են ու հիասթափված: Նրանց հիասթափության հիմնական պատճառը կառավարության կողմից «Ընտանեկան բռնության մասին» օրենքի մերժումն է:
Մարդու իրավունքերի պաշտպանի կանանց հարցերով խորհրդական Աննա Սաֆարյանի կարծիքով` օրենքի առկայության անհրաժեշտությունը շատ մեծ է:
«Անցած տարի մենք եւս բազմաթիվ բողոքներ ենք ստացել: Հունիս-դեկտեմբեր ամիսներին գրանցել ենք 133 ֆիզիկական եւ հոգեկան բռնության դեպք»,- ասաց Մարդու իրավունքների պաշտպանի խորհրդականը` նկատելով, որ ոստիկանները կարիք ունեն վերապատրաստման:
«Երբ կինը դիմում է ոստիկանին, շատ դեպքերում ոչ պատշաճ վերաբերմունք է ցուցաբերվում»,- ընդգծեց Ա. Սաֆարյանը:
Aravot.am-ի այն հարցին, թե արդյոք լինո՞ւմ են դեպքեր, երբ տղամարդն է դառնում ընտանեկան բռնության զոհ, իրավապաշտպան Մարո Մաթոսյանը պատասխանեց.
«Անշուշտ, կան: Խնդիրը հիշելու մեջ է: Լինում են դեպքեր, երբ կինն է կնոջ նկատմամբ բռնություն կիրառում: Ոստիկանության կողմից հրապարակված անցած տարվա 766 բռնության դեպքերից 145-ը տղամարդկանց դեմ է եղել իրականացված: Կանանց բռնության դեպքերը ավելի շատ են, այդ պատճառով մենք ավելի շատ խոսում ենք այդ մասին: Կարող է` տղամարդիկ ամաչում են բարձրաձայնել»:
«Կանանց ռեսուրսային կենտրոն» հ/կ-ի տնօրեն Լարա Ահարոնյանի համոզմամբ` իրենք մարտի 7-ին կառավարության շենքի դիմաց բողոքի ցույց են անելու` կառավարությունից պահանջելու՝ վերանայել որոշումը:
Նկատենք նաեւ, որ , որ «Ընդդեմ կանանց նկատմամբ բռնության» կոալիցիայի անդամները բաց նամակով դիմելու են նախագահին եւ վարչապետին:
Աշոտ ԱԹԱՅԱՆ
